bwiza.com
Ahabanza » Rusizi: Umunyeshuri yaguye mu cyobo cya metero 16 arapfa
Amakuru Politiki

Rusizi: Umunyeshuri yaguye mu cyobo cya metero 16 arapfa

Amakuru aturuka muri santere y’ubucuruzi ya Nyakabuye mu murenge wa Nyakabuye mu karere ka Rusizi aravuga urupfu rw’umwana w’imyaka 14 witwaga Batware Profime wigaga mu wa mbere w’ayisumbuye muri GS Nyakabwende, waguye mu cyobo cya metero 16 z’ubujyakuzimu cyari
cyaracukuriwe kugirwa ubwiherero ariko butaruzura, kiri mu rupangu rw’inyubako y’ubucuruzi y’uwitwa Kayumba Ferdinand.

Mu kiganiro na Bwiza.com,umunyamabanga nshigwabikorwa w’akagari ka Kamanu muri uyu murenge karimo iyi santere y’ubucuruzi Harelimana Florent,yavuze ko uyu mwana ngo wari waratangiye ingeso y’uburara n’ubujura kimwe na bamwe mu bandi bana bo muri uyu murenge,aho bibaga muri iyi santere y’ubucuruzi, ngo yari kumwe n’abandi bahungu 2 bagenzi be umwe wiga mu wa 6 undi mu wa 5 w’abanza burira igipangu cy’iyi nyubako y’ubucuruzi binjiramo.

Avuga ko ibi byabaye mu ma saa tatu z’ijoro ku wa gatatu ushize ,aho ngo muri iki gipangu habagamo inzu icururizwamo imiti y’amatungo,inyuma yayo hari indi ngo yari imaze igihe kinini nta muntu uyibamo,uyu mwana na bagenzi be ngo bakaba bari baraciye urugi rwayo batangira gushyiramo bimwe mu byo bibaga mu isoko rya Nyakabuye ariko ntihagira ubimenya,kuko na nyirayo ngo atakundaga kuhagera kuko atuye mu kandi kagari.

Ngo aba bana bajyaga muri izi ngeso bavuye kwiga, basimbutse iki gipangu cyari gikinze muri aya masaha binjira muri ya nzu bajyanamo ibyo bari bamaze kwiba,bikanze abari banyuze iruhande rw’icyo gipangu biruka basimbuka ngo bagwe inyuma yacyo biruke, uyu akandagira utubaho twari dutinze ubu bwiherero bwari bugicukurwa kuko nyira bwo avuga ko yashakaga gucukura metero 20, agwamo arapfa.

Gitifu Harelimana ati’’ bagenzi be bamaze gusimbuka igipangu ni bo bahindukiye bahuruza abantu ko hari mugenzi wabo uguye muri icyo cyobo cy’ubwiherero, natwe baraduhuruza n’ubuyobozi bw’umurenge n’inzego z’umutekano tuhageze dusanga ari byo dutegereza mu gitondo, duhamagara abazobereye imirimo yo gucukura ibyobo nka biriya umwe aramanuka abandi baramufasha
umurambo bawukuramo ujyanwa mu bitaro bya Mibilizi gukorerwa isuzuma mbere yo gushyingurwa.’’

Bamwe mu baturiye iyi santere y’ubucuruzi baganiriye na Bwiza.com bavuze ko ikibazo cy’abana bava kwiga nk’aho batashye bakajya kwiba mu isoko ndetse n’ubundi burara barimo n’abasiba ishuri cyangwa bakarita bakigira muri izi ngeso mbi cyahagaragaraga bakaba bahoraga basaba ubuyobozi ko cyafatirwa ingamba kuko ngo bahombyaga byinshi ariko ababafashe bagatinya
kwihanira bakabakanga bakagenda.

Umunyamabanga nshingwabikorwa w’uyu murenge Ngirabatware James,yemeje aya makuru avuga ko koko hari abana biga mu mashuri abanza n’ayisumbuye bari bafite ingeso y’uburara n’ubujura mu isoko ry’iyi santare y’ubucuruzi barimo n’uyu,bakaba bari basabye ababyeyi gukurikirana abana babo nyuma y’amasomo bagataha aho kujya muri izi ngeso.

Ati’’ uyu mwana yaturukaga mu muryango ukennye cyane tugakeka ko ari byo byamuteraga izi ngeso, ariko twari twarasabye ababyeyi kujya bakurikirana abana babo nyuma y’amasomo bakareba ko batashye kuko iyi ngeso y’uburara n’ubujura bw’abana babaga bavuye ku mashuri yagaragaraga nubwo tutari tuzi ko hari inzu bamwe babijyanagamo n’ingorane zaturuka kuri kiriya cyobo,ariko
ubu tugiye gukaza ingamba kuri aba bana.’’

Aba bayobozi banavuga ko bagiye gukoresha inama mu bigo by’amashuri byose byegereye iyi santere y’ubucuruzi bagakangurira abana kugira indangagaciro nzima zizira ubujura n’ubuzererezi nk’ubu bubaviramo urupfu,ababyeyi na bo,mu nama zinyuranye bagasabwa gukurikirana abana babo bakamenya niba no ku mashuri bahagera koko,cyane cyane ko bishoboka ko hari abana bajya mu ngeso nk’izi ababyeyi bibwira ko bari ku mashuri, abacukura ubwiherero na bo bakajya bibuka kubufunga neza uko batashye kugeza baburangije.

Izindi wakunda

Bwiza.com
error: Alert: Ntabwo byemewe!!