bwiza.com
Ahabanza » Amarangamutima kuri The Ben nyuma yo kumva ubutumwa bwa Fabien ucuranga atabona
Amakuru mashya Imyidagaduro

Amarangamutima kuri The Ben nyuma yo kumva ubutumwa bwa Fabien ucuranga atabona

Amarangamutima yabanye menshi Mugisha Benjamin tuzi nka The Ben nyuma yo kumva ubutumwa Hagenimana Fabien ucuranga atabona yamugeneye.

TV 10 yashyize ku rubuga rwayo rwa Instagram agace k’amashusho agize ikiganiro yagiranye na Maniragena Fabien. Bamubajije intumbero ye, asubiza ko yemera cyane ibihangano bya The Ben ku buryo yifuza no gukorana indirimbo na we.

Yavuze ko n’iyo agiye kuryama akunze kuba yumva indirimbo z’uyu muhanzi. Yongeraho kandi ko Imana ibimushoboje yahura na we akamukora mu ntoki, bagakorana indirimbo cyangwa akagira akantu k’inkunga amugenera.

Ubu kandi ni na bwo butumwa Fabien yahaye TV 10 kugira ngo bazabumugereze kuri The Ben utabarizwa mu Rwanda.

Abajijwe umwihariko wa The Ben, Fabien yasubije ko afite umuziki ufite uburemere n’ijwi rya karemano.

The Ben akibona aya mashusho, na we yayashyize kuri konte ye, n’amagambo agira ati: ” Ndumva amarira anzenga mu maso.”

Abakurikira uyu muhanzi kuri uru rubuga bagize icyo batangaza kuri ubu butumwa bwa Fabien.

Umwe yagize ati: ” Muvandi! ibi birakwibutsa ya minsi wari i Gahini. Abafite ubumuga bwo kutabona bari abafana bawe”. The Ben yamusubije ko abyibuka.

Hari undi wanditse ubutumwa bwe mu rurimi rw’Ikirundi (mu mwanya w’ibitekerezo). Yasabaga The Ben kutazacikwa n’uyu mugisha igihe azaba agarutse mu Rwanda.

Ati: ” Ubupfura no kwicisha bugufi byawe bizaguhe inyota yo gufasha (guha umugisha) abandi. Uzamushake, umugeze ku nzozi ze, muririmbane; Imana izabiguhera umugisha n’urubyaro rwawe.” Ubutumwa nagerageje kubushyira mu Kinyarwanda.

The Ben ntiyigeze yerura ngo avuge niba azashaka uburyo ahura na Fabien, bakorane indirimbo cyangwa se amuhe ubundi bufasha.

Aya ni amashusho y’ikiganiro cya TV 10 na Fabien ucuranga ‘guitar’ atabona.

View this post on Instagram

I can feel tears in my eyes ♥️

A post shared by THE BEN (@theben3) on

 

Izindi wakunda

Bwiza.com