bwiza.com
Amakuru Ubuzima

Gukora amasaha menshi byongera ibyago byo kurwara imitsi y’ubwonko-Ubushakashatsi

Abashakashatsi bavuga ko gukora amasaha menshi biteza ibyago byinshi byo kurwara indwara y’imitsi yo mu bwonko.

Ubu bushakashatsi bwakozwe n’abashakashatsi bo mu Bufaransa, bugaragaza ko amasaha menshi ari arenze amasaha 10 y’akazi ku munsi mu minsi nibura 50 mu mwaka.

Abantu  bakoreweho ubu bushakashatsi, abakoze amasaha menshi mu gihe kirenga imyaka 10 aribo bari bafite ibyago byinshi byo kurwara indwara y’imitsi yo mu bwonko.

Abakoze ubu bushakashatsi , bibanze ku makuru ajyanye n’ikigero cy’imyaka, kunywa itabi no gukora mu gihe cy’amasaha ku bantu bakuze barenga 143,000. Abo bashakashatsi bakaba ari abo muri kaminuza ya Angers bafatanije n’abo mu kigo cy’Ubufaransa gishinzwe ubushakashatsi ku buzima n’ubuvuzi.

Nyuma yo gukora igenzura, basanze abari munsi ya kimwe cya gatatu barakoraga amasaha menshi , muri bo 10% bakora amasaha menshi mu gihe cy’imyaka 10. Muri rusange abantu 1224 barwaye indwara y’imitsi yo mu bwonko.

BBC dukesha iyi nkuru ivuga ko aba bashakashatsi basanze abantu bakora amasaha menshi bafite ibyago bingana na 29% by’inyongera byo kurwara imitsi y’ubwonko. Bagakomeza baburira abantu ko abakora gutyo mu gihe cy’imyaka 10 cyangwa irenga bagira ibyago byinshi kurushaho biri ku kigero cya 45%.

Dr Alexis Descatha wyoboye iri tsinda ry’abashakashatsi, yavuze ko isano hagati yo gukora imyaka 10 ukora amasaha menshi n’uburwayi bw’imitsi yo mu bwonko yiganje kurushaho mu bafite munsi y’imyaka 50 y’amavuko.

Dr Richard Francis ukuriye ishami ry’ubushakashatsi mu ishyirahamwe ryo mu Bwongereza ryita ku barwayi b’indwara y’imitsi yo mu bwonko agira inama abantu gukoresha igihe neza kurushaho. Ikindi kandi hari ibintu abantu bashobora gukora mu rwego rwo guhangana n’ingaruka zo gukora amasaha menshi.

Mu byo wakora ugahangana n’izi ngaruka harimo; gukora imyitozo ngororamubiri, gukoresha igihe cyawe neza, kurya indyo yuzuye , kureka kunywa itabi ndetse no gusinzira igihe gihagije.

Izindi wakunda

Bwiza.com