bwiza.com
Ahabanza » Rusizi: Imirenge ya Butare na Bweyeye yugarijwe n’igwingira n’imirire mibi ku bana bari munsi y’imyaka 5
Amakuru Politiki

Rusizi: Imirenge ya Butare na Bweyeye yugarijwe n’igwingira n’imirire mibi ku bana bari munsi y’imyaka 5

Ubuyobozi bw’ubuzima mu karere ka Rusizi buvuga ko nubwo no mu yindi mirenge y’akarere ka Rusizi irimo na Kamembe,Gihundwe na Mururu y’umujyi ikigaragaramo abana bari munsi y’imyaka 5 bafite ibibazo by’igwingira n’imirire mibi,ariko imirenge ya Butare na Bweyeye yo ifite ibipimo biri hejuru cyane ugereranije n’indi,ababyeyi n’abayobozi baho bagasabwa ingamba zihariye ngo bahangane n’iki kibazo giteye inkeke.

Aganira na Bwiza.com, umukozi w’aka karere ushinzwe ubuzima no gukumira indwara Habarugira Wencesilas,yavuze ko nubwo no mu yindi mirenge iki kibazo gihari bakaba bagenda bahangana na cyo ariko iyi mirenge yo imibare ikomeza kuba hejuru,akaba atavuga rumwe n’abaturage baho ku gitera ibi bibazo ugereranije n’ahandi nubwo na we avuga ko hakiri ibibazo by’umwihariko nko kuba serivisi z’ubuzima zikibari kure n’ibindi.

Ati’’ mu murenge wa Butare dukunze kubona imibare iri hejuru y’abana bari munsi y’imyaka 5 barwaye imirire mibi ihutiyeho n’abagwingira,mu wa Bweyeye ho bakanagira ikibazo cy’umwihariko wo kuba kure cyane y’ubuyobozi bw’akarere na serivisi z’ubuzima zitabegereye neza uko byakagombye naho tukahabona abana benshi bafite imirire mibi ihutiyeho ariko ikabije,bigera n’aho usanga abana benshi mu ibara ry’umutuku bakanabyimba utuda n’ibindi bice by’umubiri bigirwaho ingaruka cyane.’’

Abagabo bo mu Murenge wa Butare basabwe kudatererana abagore

Avuga ko ubusanzwe mu mirire mibi hari iza buhoro buhoro hakaba n’ihita igaragara vuba vuba ari yo yitwa imirire mibi ihutiyeho ,akavuga ko mu mihigo y’uyu mwaka basoza bari bafite abana bakurikirana 47 bari bafite ibibazo by’imirire mibi harimo n’abari mu mutuku,hakaba abana bahaga amata kubera ikibazo cy’ibilo bike cyangwa kugwingira bagera kuri 94 mu murenge wa Butare, bakagira abandi 25 bari bari mu mirire mibi ihutiyeho,abarenga ½ cyabo bari mu mutuku,hakaba n’abana 51 bazahajwe no kugwingira muri Bweyeye ,akabibonamo ikibazo gikomeye cyane.

Bamwe mu babyeyi bo muri iyi mirenge baganiriye na Bwiza.com kuri ibi bibazo,bavuze ko ubukene n’ubwigunge bukabije babamo kubera ibikorwa remezo bidahagije ari bwo butuma bayirwaza kuko ngo kugira ngo uzabone ikintu ukuraho ifaranga hariya bitoroshye no kwiteza imbere bikagorana ngo babone n’ibyo baha aba bana,kuba hari abagikora ingendo nini cyane ngo bagere ku bigo nderabuzima banagirwe inama y’imirire y’abana no kuba hakiri abana benshi babyara bakiri bato bagaterera abana ba nyirakuru batakinabasha kubona ngo babarere,bakabarwarana imirire mibi.

Bigishijwe ko isuku iri mu bituma abana bagira imibereho myiza

Umukecuru w’imyaka irenga 70 wo mu murenge wa Butare ati “nk’ubu mfite abuzukuru 2 umukobwa wanjye yabyaye arabanjugunyira arigendera kandi singishobora kugira icyo nimarira n’abo bana simbashoboye n’ayo mata babaha iyo bagiye ibikurikiraho ntubimbaze. Babuzwa n’iki kurwara se? Uwatwigishiriza abana bakajya babyara bakuze cyangwa ababatera inda bakabitahontibadushyire ku mugogoro natwe tutanishoboye ahari byagabanuka na ho ubundi n’abo wumva bavuga jye mbona ari bake nkurikije ibibazo dufite inaha.’’

Ibi ariko ntabyemeranywaho n’uyu mukozi w’akarere usanga imyumvire y’abaturage b’iyi mirenge ari yo ibitera cyane,aho bamwe baba batazi gutegurira abana indyo yuzuye,aho usanga umwana arya mu gitondo akongera nimugoroba nk’abantu bakuru,n’ibyo ariye ukabona bidakwiranye na we.

Intore zo ku rugerero zigishije ababyeyi guteka indyo yuzuye

Ikindi kinakomeye cyane ngo ni uko usanga iby’imirire y’abana abenshi mu bagabo batabikozwa bakabiharira abagore babo gusa,ubuharike n’ubushoreke bukiri hejuru n’icyo umugabo abonye aho kugishyikiriza umuryango kigashirira mu mahabara na byo bikaba imbogamizi,agasaba abayobozi kongera imbaraga bagahangana n’ibi bibazo.cyane cyane ko n’urwego rw’isuku yaho rukiri hasi kandi na yo igira uruhare mu kurwaragurika kwabo.

Kugeza ubu ku rwego rw’akarere 34,7% by’abana bari munsi y’imyaka 5 ni bo bafite ibibazo by’imirire mibi, bakifuza kujya munsi ya 20% byabo mu myaka ya vuba,cyane cyane ko banifashisha intore zo ku rugerero mu kubihashya.

 

Izindi wakunda

Bwiza.com
error: Alert: Ntabwo byemewe!!