bwiza.com
Amakuru Mu mashuli

Nyamasheke: Abakobwa biga muri G.S FAK batagira icumbi ryo kuraramo baremwe agatima

Ubuyobozi bw’akarere ka Nyamasheke n’ubw’itorero Méthodiste Libre mu Rwanda buravuga ko bukomeje guhangayikishwa bikomeye n’uburyo abana biga muri GS Frank Adamson de Kibogora( GSFAK) bararamo kugeza ubu nyuma y’uko inyubako bararagamo ifatiwe n’inkongi y’umuriro. Bukizeza abana n’ababyeyi babo ko hari uburyo bumaze gukusanywa, imirimo yo kubaka inyubako nshya ikaba igiye gutangira mu gihembwe cya 3 bakazayiraramo.

Ni bimwe mu byabwiwe aba bana n’umuyobozi w’akarere ka Nyamasheke, Kamari Aimé Fabien n’umwepisikopi w’itorero Méthodiste Libre mu Rwanda, Musenyeri Samuel Kayinamura ubwo, bo n’ababaherekeje barimo umuyobozi wa BNP/CPR ku rwego rw’igihugu,Rév.Samuel Mutabazi,ababwiriza ba Conference za Kinyaga,Kibogora,Kibuye na Ruhengeri, babasuraga bagiye kubakomeza no kureba uko biga nyuma y’ibyababayeho byo guhisha ibikoresho byose ntibagire na kimwe barokora,banabazaniye ubufasha bwa matola 33 babageneye nk’inshumbushanyo.

Akarere kandi kashyikirije iri shuri amabati 225 yari akenewe ngo iyi nyubako itangire isanwe mu buryo bwifuzwa, kayahawe na Minisiteri ishinzwe iby’ubutabazi nyuma y’ubuvugizi kabakoreye , mu bakobwa 280 bose bararaga muri iyo nyubako yahiye abagera kuri 244 bakaba bamaze guhabwa matela ngo hasigaye 36 na bo iki gihembwe kigomba kurangira bazibonye kuko ubuvugizi bukomeje kandi ngo bigenda neza,nk’uko Bwiza.com yabitangarijwe n’umuyobozi w’iri shuri Rév.Ukizebaraza Léon Emmanuel,wanavuze ko
amafaranga yo gutangira gusana iyi nyubako yabonetse bagiye gutangira.

Mu kiganiro n’aba bana b’abakobwa, Nyiricyubahiro Musenyeri Samuel Kayinamura, yabashimiye kudacibwa intege n’ibi byago bahuye na byo bagakomeza kwiga neza ndetse igihembwe cya mbere bakagitsinda neza, ababwira ko abakirisitu bose b’itorero Méthodiste Libre mu Rwanda bakomeje kubaba hafi bakusanya icyo bashoboye cyose ngo inyubako nshya iboneke banabone n’ibindi bakeneye ngo bige neza, anashimira ababyeyi uburyo mu
nama n’ubuyobozi iheruka bitanze uko bashoboye ngo iyi nyubako iboneke abana babo bongere kurara neza,abasaba gukomeza kwigana umwete.

Ati “turara dutekereza uburyo mwakongera kuryama neza nka mbere kandi biri mu nzira nziza kuko ubuvugizi dukora butanga umusaruro tukanashimira abitanga bose ngo muzongere muryame neza, tukanabashima cyane uburyo mutacitse intege ahubwo mwakomeje kwiga neza, tukabasaba gukomeza umurava natwe ntituzatezuka kubaba hafi.’’

Gikundiro Exoline wiga mu wa 5 akaba anahagarariye bagenzi be,yavuze ko
bashimishishwa n’uko ubuyobozi, ari ubwa Leta n’ubwitorero bubahora hafi,aho ngo bari bahishije ibifite agaciro ka miliyoni 12 bakaba bamaze gushumbushwa iby’agaciro ka miliyoni 11 n’ibisigaye akizera ko bizaboneka vuba.

Ati’’ dukomeje kurara nabi kuko turara mu tuzu duto tutabigenewe,nubwo twahawe ibikoresho hafi ya byose tukaba dusigaje inkweto n’amasogisi bikaba ari ikibazo gikomeye cyane ku bana baturuka mu miryango itishoboye batabona inkweto bambara uko byakagombye,tugasaba ko zaboneka,ariko ibindi byo nta kibazo turiga neza rwose.

Umuyobozi w’aka karere Kamari Aimé Fabien na we yabashimiye kudacika intege bagaragaje nyuma y’ibyo bibazo,ababwira ko hakomeje ubuvugizi ngo bubakirwe, abizeza ko na MINEDUC ishobora kuzagira icyo ibagenera kuko yo inkunga yayo itarabageraho kandi bayizeye.

Inyubako yararagamo abakobwa 280 yahiye bwa mbere ku wa 20 Mutarama uyu mwaka ahahiye ntibagira icyo baramura,ku wa 23 Mutarama igice cyari gisigaye na cyo kirashya, abana bimurirwa mu tuzu duto twari duhari, ku wa 10 Gashyantare kamwe mu twaumba abana bari bashyizwemo na ko karashya,ku wa 6 Werurwe akumba kararagamo abakobwa 9 na ko karakongoka.

Nyuma haje gutabwa muri yombi umukobwa wakekwaga n’abahungu 3 bakekwaga ubufatanyacyaha ariko ngo baza kurekurwa ubuyobozi bw’iri shuri bukavuga ko na n’ubu bugitegereje ubutabera,ariko ko bwafashe ingamba zihamye ko izi nkongi zitazongera.

Amabati 225 y’inkunga yatanzwe na Minisiteri ufite ubutabazi mu nshingano

Izindi wakunda

Bwiza.com