bwiza.com
Ahabanza » Rwanda/DRC: Perezida Kagame asanga umubano w’ibihugu byombi utanga icyizere
Amakuru Politiki

Rwanda/DRC: Perezida Kagame asanga umubano w’ibihugu byombi utanga icyizere

Perezida Kagame yagaragaje ko aho mugenzi we, Felix Tshisekedi atorewe kuyobora Repubulika Iharanira Demokarasi ya Congo, iki gihugu gifitanye umubano mwiza n’ U Rwanda ndetse unatanga icyizere.

Ni amezi atandatu ashinze Perezida Tshisekedi atorewe kuyobora Repubulika Iharanira Demokarasi ya Congo, muri iki gihe gishize, Perezida Kagame avuga ko hari ibimaze gukorwa hagati y’ibihugu byombi bimwe muri byo byari byarananiranye ku bwa Joseph Kabila wakiyoboye imyaka 17.

Ingendo za Rwandair Kigali-Kinshasa ku isonga

Mu kiganiro  yagiranye n’ ikinyamakuru cyo mu Budage “Taz International”, mu cyumweru gishize , Perezida w’ U Rwanda akaba na Perezida w’ Umuryango wa Afurika y’i Burasirazuba (EAC), Paul Kagame yatangaje ko umubano w’ ibihugu byombi urushijeho gutera imbere.

Yavuze ibi agereranyije n’ ukuntu byari bimeze mu gihe Congo-Kinshasa yayoborwaga na Perezida Joseph Kabila, aho uyu yigeze kwanga ko indege za Rwandair zajya zikorera ingendo i Kinshasa.

Perezida Paul Kagame yagize ati” Twari twasabye Guverinoma yacuye igihe  ya Joseph Kabila ko sosiyete yacu y’ indege (Rwandair) yajya ikora ingendo zihuza Kigali na  Kinshasa arabyanga pe!ntabwo numvaga impamvu ariko nibaza ko ari politike gusa! Kuko kuva Perezida Tshisekedi yatangira kuyobora yahise abyemera”.

Muri iki kiganiro Perezida Kagame yashimangiye ko imikoranire hagati y’ ibihugu byombi ikomeje kujya imbere ndetse anerekana ko impande zombi zikomeje kubyungukiramo, ngo kuko n’ abagenzi batwara n’ indege za Rwandair bakomeje kwiyongera ku buryo bugaragara.

Abaperezida bombi bafitanye imigambi myinshi

Perezida Paul Kagame w’u Rwanda na mugenzi we Félix Tshisekedi utegeka DRC, ubwo bombi bari mu muhango wo gusoza inama mpuzamahanga yiswe Africa CEO Forum 2019 yari imaze iminsi ibera i Kigali bemeranyije kuzateza imbere ubukungu.

Abakuru b’ibihugu byombi bemeranya ko hakwiye kubaho ubufatanye bwihariye, mu nzego zose zigamije iterambere ry’ibihugu byombi, byumwihariko ngo iterambere rishingiye ku baturage b’impande zombi.

Mu birebana n’ubukungu, U Rwanda na DR Congo ngo bigiye kwihutisha ishyirwa mu ngiro amasezerano arebana n’umuryango w’isoko rusange rihuriza hamwe ibihugu byo muri Afurika y’iburasirazuba n’amajyepfo (COMESA).

Ibi bihugu byombi kandi binahuriye mu muryango w’ubukungu w’ibihugu byo mu karere k’ibiyaga bigari (CEPGL) n’ubwo imishinga imwe n’imwe yo muri uyu muryango yadindiye.

Mu myaka isaga 20 ishize, amashyamba ya RDC yahindutse indiri y’ibikorwa bigamije guhungabanya umutekano w’u Rwanda, bityo hari ibikorwa bitanga ikizere ko hari ibizakemuka ku birebana n’umutekano ku bihugu byombi.

Mu mpera za Mutarama 2019, Ubushinjacyaha bw’u Rwanda bwatanze impapuro nshya zisaba itabwa muri yombi rya Kayumba Nyamwasa n’abandi bayobozi bari ku ruhembe rw’umutwe w’abarwanyi uzwi nka P5 cyangwa RNC, bivugwa ko wisuganyiriza mu mashyamba ya RDC, ugamije guhungabanya umutekano w’u Rwanda.

Mbere y’uko ava ku butegetsi, Perezida Joseph Kabila yemeye guha u Rwanda abantu babiri bari bakomeye muri FDLR inzego z’umutekano z’igihugu cye zafashe, barimo Laforge Fils Bazeye wari umuvugizi wa FDLR na Lieutenant-Colonel Abega wari ushinzwe iperereza muri uwo mutwe.

Nyuma y’ibiganiro abakuru b’ibihugu byombi bagiranye ku birebana n’umutekano, birashoboka ko n’abandi bazafatwa nk’uko na Minisitiri w’ububanyi n’amahanga w’u Rwanda, Dr Sezibera Richard yabitangarije abanyamakuru, ko nyuma y’ifatwa rya  Nsabimana Callixte (Sankara) n’aba bayobozi ba FDLR hari ikizere cy’ifatwa ry’abandi.

 

 

 

 

Izindi wakunda

Bwiza.com