bwiza.com
Ahabanza » CAN 2019: Abakinnyi ba Nigeria bakoze imyigaragambyo banga gukora imyitozo
Imikino

CAN 2019: Abakinnyi ba Nigeria bakoze imyigaragambyo banga gukora imyitozo

Abakinnyi bakomoka mu gihugu cya Nigeria bakoze imyigaragambyo banga gukora imyitozo yo kwitegura umukino  bafitanye na Guinea ,kubera ko ngo batahawe amafaranga y’agahimbazamusyi bemerewe.

Kuri uyu wa kabiri tariki ya 25 Kamena 2019 ,aba Nigeria banze kwitabira imyitozo yari iteganijwe uyu munsi mu rwego rwo kwitegura umukino bafitanye n’igihugu cya Guinea ku wa gatatu tariki ya 26 Kamena 2019.

Nigeria yitabiriye imikino y’igikombe cya Afurika irikubera mu Misiri. Ikaba ihereye mu itsinda rya kabiri aho irikumwe na Burundi,Madagascar na Guinea. Umukino ubanza ikaba yaratsinze u Burundi igitego kimwe ku busa.

Abakinnyi ba Nigeria barasaba ko bahabwa amafaranga y’agahimbazamusyi bemerewe n’ishyirahamwe ry’umupira w’amaguru muri Nigeria (NFF) angana n’ibihumbi icumi by’amadorari( $10,000).Ishyirahamwe ry’umupira w’amaguru muri Nigeria rikaba ivuga ko riri gukora ibishoboka byose ngo aya mafaranga aboneke.

Umutoza wa Nigeria Gernot Rohr yagiye mu kiganiro n’abanyamakuru wenyine mu gihe byari biteganijwe ko ajyana na Ahmed Musa. Yagize ati’’ Umukinnyi wanjye Ahmed Musa ntabwo yaje mu kiganiro kubera ko bafite inama y’ingenzi’’

‘’Ndizerako ikibazo gihari kigiye gukemuka ahasigaye tugategura ibidutegereje’’ Yakomeje avuga ko abakinnyi batameze neza mu mutwe.

Yagize ati’’Ndabizi ko abakinnyi biteguye kabone n’ubwo baba bafite imvune cyangwa barwaye gusa muri ibi bihe turimo, iriya nama ntabwo ari ngombwa ‘’

Si ubwambare ikipe ya Nigeria yanze gukora imyitozo kuberako itahembwe, kuko no muri 2014 mu gikombe cy’isi, banze gukora imyitozo kubera ko batari bahembwe. Ibi bintu bimaze kuba umuco muri Nigeria dore ko n’ikipe y’igihugu y’abagore yari yanze gusohoka mu ndege muri Afurika y’epfo bavuga ko batarasohoka badahawe amafaranga.

Iyi myitwarire idahwitse ikunze gukoma mu nkokora umusaruro w’ikipe y’igihugu ya Nigeria ndetse bigatanga n’isura mbi ku mugabane wa Afurika muri rusange. Nigeria iheruka kwegukana igikombe cya Afurika muri 2013.

Nkurunziza Viateur@bwiza.com

Izindi wakunda

Bwiza.com
error: Alert: Ntabwo byemewe!!