bwiza.com
Amakuru mashya Umutekano

RDC: Hagiye gukorwa operasiyo mu duce twugarijwe n’umutekano muke

Umukuru w’igihugu cya Repubulika Iharanira Demukarasi ya Congo, Felix Tshisekedi yatangaje ko hagiye gukorwa za ‘operations’ mu duce dutatu twugarijwe cyane n’umutekano muke uterwa n’inyeshyamba ndetse n’imitwe y’iterabwoba.

Djugu na Mahagi mu ntara ya Ituri na Minembwe muri Kivu y’Amagepfo ni two duce Tshisekedi yatangarije mu isabukuru y’imyaka 59 iki gihugu kimaze kibonye ubwigenge ku wa 29 Kamena 2019.

“Igitero giherutse mu ntara ya Ituri cyarambabaje cyane kuko cyagaragaje ko tugifite icyuho kinini mu kubungabunga amahoro n’umutekano. Byatumye ntegeka igisirikare gukora za operasiyo mu duce twa Djugu na Mahagi, zikazakomereza muri Minembwe.” Tshisekedi.

Agace ka Djugu kugarijwe cyane n’umutekano muke mu 2017 no mu 2018. Muri ibi bihe, abasaga 200 barishwe, amazu aratwikwa, abandi basaga 2000 bahungiye muri Uganda baciye mu Kiyaga cya Albert. Djugu na Mahagi honyine muri iyi ntara hamaze guhunga abarenga 300,000 ku bw’umutekano muke.

Ituri ni intara yugarijwe cyane  n’icyorezo cya Ebola ariko ubuvuzi n’ubwirinzi bwayo bukomwa mu nkokora n’ibitero by’abitwaje intwaro bikunze kuhagabwa. Ishami ry’Umuryango w’Abibumbye riharanira uburenganzira bw’ikiremwamuntu rivuga ko hagati ya tariki ya 10 na 13 Kamena 2019, abantu 117 biciwe muri ibi bitero barimo 94 bo muri Djugu na 23 muri Mahagi.

Minembwe ni igiturage giherereye mu misozi ya Uvira, mu gace ka Mulenge gatuwemo n’Abanyamulenge. Gakunze kwibasirwa cyane n’imitwe yitwaje intwaro yibasira ubu bwoko, bikavugwa ko ari Red Tabura irwanya ubutegetsi bw’u Burundi na Mai Mai.

Mu minsi ishize, Abanyamulenge bavugaga ko ubu bwicanyi bakorerwa nta ho butandukaniye na Jenoside, bakavuga ko nta n’icyo leta ibikoraho. Baremye imitwe yo kwirwanirira ariko ngo abayigize bahigwa bukware n’aba bitwaje intwaro. Amazu yabo aratwikwa, bamwe bakicwa, abandi bagahungira mu mashyamba.

Izindi wakunda

Bwiza.com