bwiza.com
Ahabanza » Rusizi: Abakozi b’imishinga basabwe kugira imikorere izira akajagari
Amakuru Politiki

Rusizi: Abakozi b’imishinga basabwe kugira imikorere izira akajagari

Abayobozi n’abakozi b’imishinga  12 iterwa inkunga na Compassion international mu karere ka Rusizi  bongeye kwibutswa inshingano zabo mu kubonera abana bagera ku 3250 bitaho ubumenyi n’ubrere bukwiye, ku bufatanye n’abashumba b’amatorero ya gikirisitu iyo mishinga ikoreramo,buri wese asabwa kwitanga atizigama  no kunoza imikorere ngo aba bana bitaho mu bihe biri imbere bazabashe kwigirira akamaro batezweho bakagirire n’igihugu.

Ni bimwe mu byavuye mu mwiherero w’iminsi 2 wahuje abayobozi n’abandi bakozi b’iyi mishinga n’abashumba b’amatorero ya gikirisitu  ikoreramo,bose hamwe bagera kuri 59, baganirizwa ku kamaro bakwiye kugira nk’abategerejweho umusaruro n’igihugu cyose, kuko aba bana bafasha ari abaturuka mu miryango itishoboye,imfubyi n’abandi bafite ibibazo binyuranye bikomeye by’imibereho,bakagira inshingano zo kubagobotora  ku ngoyi z’ubukene, bakagira icyizere cy’imibereho myiza y’ejo hazaza.

Ibi ariko ngo ntibyashoboka igihe ukwiye gukura aba bana mu bwihebe n’ubwigunge bashyizwemo n’imibereho mibi bahuye na yo bakiri bato atumva neza inshingano ze, igihe ushinzwe ubuzima atumva neza icyo uyu mwana akwiye ngo agire ubuzima bwiza, ushinzwe  umutungo awucunga nabi wa mwana ntabone ibyo agenewe, ari yo mpamvu n’aba babashinzwe bagomba kwigishwa kugira ngo buri wese akorere mu mucyo n’umwana urerwa awukuriremo.

Aganira na Bwiza.com, Rév Past. Kabalisa JMV,umushumba wa  paruwasi ya Bugarama, yavuze ko umukozi ukwiye agomba kuba yumva neza icyo akora,aho akura abo ashinzwe n’aho akwiye kubageza, ari yo mpamvu bifuza ko n’aba banoza ibyo bakora bakirinda imikorere y’akajagari kugira ngo  batange umusaruro bategerejweho.

Ati’’ dufata abana bafite ibibazo binyuranye bikomeye cyane bishingiye ku mibereho,buri mwana akagira umwishingizi,agafashwa kwiga,akavuzwa neza igihe arwaye, akitabwaho muri byose na we agashimishwa n’ubuzima, kugira ngo byose bigerweho bisaba ko ubikoramo aba abyumva neza,afite urukundo rw’uwo mwana, ni yo mpamvu y’uyu mwiherero ngo bongere bibutswe inshingano zabo ,icyo basabwa ngo bazuzuze neza n’ibibazo bahura na byo ngo twungurane ibitekerezo,tubashe koko kugobotora uriya mwana mu ngoyi z’ubukene mu izina rya Yesu nk’uko twabyiyemeje.’’

Mu bibazo aba bayobozi n’abakozi bahura na byo nk’uko na byo Bwiza.com yabitangarijwe na Nyirabwimana Emilienne uyobora umushinga RW 0393 Butambamo mu murenge wa Nzahaha, ngo hari icy’ababyeyi bamwe bamera nk’abataye inshingano zabo zo kurera,bakumva ko ubwo umwana afite abamufasha mu bindi yabaye uwabo we uburere bwe butakimureba,  abana bishyurira mituweli kuko bishyurira uwo bitaho gusa ariko ugasanga abandi muri urwo rugo ntibishyuriwe bigatuma na wawundi iyo arwaye biba ibibazo, n’ibindi yumva bikwiye gukemuka ngo barusheho kubaho neza.

Kuri ibi,umukozi wa Compassion international ushinzwe iyi mishinga 12 muri aka karere,Uwintije Jean Damascène,yongera gukebura ababyeyi abibutsa inshingano zabo z’ibanze zo kurera,ko ufasha umwana adasimbura uwamubyaye cyangwa umurerera wundi mu muryango, abafite iyo ngeso bakisubiraho,ubuyobozi bw’inzego z’ibanze na bwo bugakomeza gukangurira ababyeyi gutanga mituweli,nk’igihe uyu ayitangiwe abandi ntibamuzitire kwivuza  arwaye.

Nubwo akarere ka Rusizi kabarirwamo imishinga nk’iyi irenga 25 ifasha abana benshi,ngo haracyari n’abandi bagikeneye kwitabwaho,cyane cyane ko hari ikibazo cy’abana benshi babyara batarageza ku myaka y’ubukure abo babyaye bakabaterera abatabashoboye bakandagara kandi n’iyi mishinga itababonera ababitaho bose, umukozi wako  ukorana bya hafi n’abafatanyabikorwa mu iterambere ryako,Mutarutinya Théogène akaba yarasabye abahuguwe kurera aba bana babatoza urukundo rw’igihugu no gukunda abandi, abangavu na bo bakigishwa imyitwarire iboneye kugira ngo birinde kubera umutwaro igihugu.

Izindi wakunda

Bwiza.com
error: Alert: Ntabwo byemewe!!