bwiza.com
Ahabanza » Nyamasheke: Abahinzi b’icyayi basabwe kubungabunga ibikorwa remezo begerezwa
Amakuru Ubukungu

Nyamasheke: Abahinzi b’icyayi basabwe kubungabunga ibikorwa remezo begerezwa

Ubuyobozi bw’akarere ka Nyamasheke n’ubw’uruganda rw’icyayi rwa Gisakura burasaba abahinzi b’icyayi  bakorana na rwo gufata neza ibikorwaremezo begerezwa kugira ngo inkunga z’abafatanyabikorwa na Leta zibageraho zijye zikora ibindi bikenewe aho gusana ibyagombaga kuba byaritaweho mbere.

Babisabwe ubwo Coopétarive y’abahinzi b’icyayi  COOPTHE Mwaga-Gisakura yashyikirizwaga ibikorwaremezo binyuranye yubakiwe n’umushinga w’abanyamerika ushinzwe guteza imbere Afurika binyuze mu makoperative ( USADF),bikaba ngo byari bikenewe cyane mu kongera umusaruro w’iki cyayi, kugisoroma neza no  kukigeza mu ruganda kitangiritse.

 Bashyikirijwe  imihanda 3 yose hamwe y’ibilometero 15 inyura mu mirima y’icyayi, ikemuye ibibazo bikomeye cyane bijyanye n’isoroma ry’icyayi  ryatezaga ibihombo bikomeye cyane, aho hari ahatagerwaga mu mirima kubera nta mihanda icyayi gihari kigapfa ubusa kuko n’abasoromyi bangaga kuhagera,bikaba ngo byari byarahombeje aba bahinzi cyane bigatubya umusaruro bahoraga  biteze, iyi mihanda ikaba ibaye imbarutso yo kongera umusaruro mu bwinshi no mu bwiza.

Hari kandi  imodoka 2 zo mu bwoko bwa Hino zigiye gufasha kugeza icyayi kibisi mu ruganda aho byari bigoye cyane kukihageza mu gihe zimwe mu zakoreshwaga zari zimaze gusaza cyane,  inzu yo kubikamo ifubire n’ibindi bikoresho bya koperative, ibiraro 2 byari byarapfuye bikabangamira imodoka zitwaye icyayi kubona aho zikinyurana,zimwe ntizirirwe zijya mu mirima icyayi kikangirika, abahinzi ,uruganda n’igihugu muri rusange bakahahombera cyane,banashyikirijwe na hangari 2 nshyashya n’ubwiherero bwazo, zigiye gufasha gukusaniriza hafi umusaruro wasoromwe imodoka zikabona uko ziwutwara,hanasanwa izindi 16 zari zarangiritse,ibikorwa byose hamwe byuzuye bitwaye amanyarwanda 166.902.770.

Ngirinshuti Callixte

Umuyobozi w’iyi koperative Ngirinshuti Callixte yashimiye cyane aba bafatanyabikorwa kubera ibibazo bikomeye bakemuriye igihugu cyose kuko amadovize aturuka muri iki cyayi agira uruhare rukomeye cyane mu iterambere ry’igihugu.

Ati’’ urebye akamaro  biriya byose twashyikirijwe bigiye  kutumarira ni ntagereranywa kuko nta na kimwe kitari gikenewe ngo gifashe abahinzi n’abasoromyi b’icyayi  kongera umusaruro mu bwinshi no mu bwiza,kandi mu gihe gito cyane tumaze tubikoresha byaratwunguye bikomeye, kuko ugereranije  aya mezi 5 shize n’andi nk’ayo y’umwaka ushize twongereye toni 200 ku musaruro ubundi wapfaga ubusa kubera izi ngorane zose kandi twiteguye gukomeza kuwongera cyane kuko ibyatuzitirage bikuweho.’’

Asaba abahinzi bagenzi be  n’abasoromyi bajyaga binubira gusoroma muri biriya bice bitagiraga imihanda kubyaza umusaruro  aya mahirwe akomeye babonye bagasoroma icyayi cyinshi kandi cyiza ntihagire igisigara mu mirima nk’uko byari bimeze mbere.

Umuyobozi w’uruganda rw’icyayi rwa Gisakura Mungwakuzwe Yves, na we yashimiye cyane aba bafatanyabikorwa igikorwa gikomeye bakoreye abanyarwanda bose,ashima ariko cyane cyane Leta  yitaye ku muhinzi w’icyayi mu buryo butangaje kuko ibikorwa nk’ibi mbere bitabagaho, yizeza ko bagiye gufatanya kubyaza umusaruro ufatika ibi bikorwa remezo,amafaranga yinjira mu ruganda no mu bahinzi akiyongera bifatika.

Mu gihe bigaragara ko hari abahabwa ibikorwa remezo nk’ibi bikangirika bitamaze kabiri kubera gufatwa nabi, umuyobozi w’aka karere Kamari Aimé Fabien yabagiriye inama yo kuzigamira ibikorwa remezo nk’ibi kuko batazahora bategereje ak’imuhana, bakabifata neza n’ibyangiritse bigasanwa vuba   hadatakajwe amafaranga yo kubyubaka bushyashya kandi yagombaga gukora ibindi.

Mu rwego rwo gufasha andi makoperative akizamuka akora ibikorwa binyuranye aturiye uru ruganda kugira aho ageza abanyamuryango bayo mu iterambere, COOPTHE Mwaga-Gisakura  na yo yahaye inkunga y’amafaranga 8.345.021 agera muri 5 muri yo, umuhuzabikorwa wa USADF ku rwego rw’igihugu Kayigi Godeffrey wishimiye ibi bikorwa byose,akaba yijeje aka karere ubufatanye  mu iterambere ryako.

 

Imihanda ica mu mirima y’icyayi ifasha abagikoramo kunoza akazi kabo
Imihanda ica mu mirima y’icyayi ifasha abagikoramo kunoza akazi kabo

 

Izindi wakunda

Bwiza.com
error: Alert: Ntabwo byemewe!!