bwiza.com
Ahabanza » Rulindo: Imodoka yafatiwemo udupfunyika dusaga 400 tw’urumogi ruhishe mu kajerekani
Amakuru Politiki

Rulindo: Imodoka yafatiwemo udupfunyika dusaga 400 tw’urumogi ruhishe mu kajerekani

Mu mpera z’iki cyumweru dusoje, abapolisi bo mu ishami rishinzwe umutekano wo mu muhanda Kigali-Musanze bafashe imodoka y’ivatiri irimo abasore batunu mu Karere ka Rulindo mu murenge wa Rusiga ifite icyapa kiyiranga RAC 671U ipakiye udupfunyika 491 tw’urumogi mu kajerikani.

Abo basore ni  Nizeyimana Hemed w’imyaka 32 ari nawe mushoferi, Twiyegeranye Jean Baptise w’imyaka 24,Mugabo Josue 19 w’imyaka, Ikimpaye Christophe w’imyaka 25 na Tumusingize Isaie w’imyaka y’amavuko 27 y’amavuko.

Umuvugizi wa Polisi mu mujyi wa Kigali Chief Inspector of Police (CIP) Marie Gorette Umutesi, yavuze ko iyi modoka yari ivuye mu karere ka Rubavu yerekeza mu mujyi wa Kigali ari n’aho yari izanye urwo rumogi, bakaba bahise bashyikirizwa Urwego rw’Ubugenzacyaha(RIB) rukorera kuri sitasiyo ya Nyarugenge.

CIP Umutesi yavuze ko urubyiruko arirwo abacuruza ibiyobyabwenge bakunda kwifashisha ndetse rukaza ku isonga mu kubinywa. Yabasabye kutijandika muri ibyo bikorwa bibi bibangiriza ubuzima bikanabafungisha.

Yagize ati “Turakangurira urubyiruko kwitandukanya n’ibiyobyabwenge kuko nta kiza bibagezaho uretse kubangiriza ubuzima no gufungwa bityo bakaba bangije ejo hazaza habo n’aho u Rwanda rw’ejo.”

Yakomeje avuga ko Polisi y’u Rwanda iri maso ku buryo itazahwema gufata abacuruza ibiyobyabwenge n’abandi banyabyaha hagamijwe kubasubiza mu murongo mwiza.

Ati “ Amayeri yose abacuruza ibiyobyabwenge bakoresha ntazabura kumenyekana kuko Polisi y’u Rwanda ubumenyi n’ubunararibonye ifite itazabura gutahura abakora ibinyuranyije n’amategeko.”

Umuvugizi wa Polisi mu mujyi wa Kigali arasaba abaturage bose gutanga amakuru hakiri kare kugira ngo habeho kurinda no kurwanya ikwirakwizwa ry’ibyo biyobyabwenge mu baturage, akanasaba kandi ababyeyi guha abana babo uburere bwiza babarinda kwishora mu biyobyabwenge.

Yanasabye ababinywa n’ababicuruza kubireka kuko nta nyungu bakuramo uretse kubangiriza ubuzima no gufungwa nyuma yo gukora ibyaha binyuranye nko gukubita no gukomeretsa, gufata abagore n’abana ku ngufu n’ibindi.

Aba basore nibahamwa n’icyaha bazahanwa n’ingingo ya 263 mu gitabo cy’itegeko riteganya ibyaha n’ibihano muri rusange ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

Iyo abihabijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye; bibarizwamo n’urumogi.

Izindi wakunda

Bwiza.com