bwiza.com
Ahabanza » Amerika yatangaje igitegereje Umunyarwanda ushinjwa kwicira Abatutsi muri CHUB
Amakuru

Amerika yatangaje igitegereje Umunyarwanda ushinjwa kwicira Abatutsi muri CHUB

Leta Zunze Ubumwe za Amerika zitangaza ko Umunyarwanda, Jean Leonard Teganya ushinjwa kwica Abatutsi bari mu bitaro bya Kaminuza i Butare (CHUB mu 1994), agiye gufungwa imyaka umunani kandi ko azahita yoherezwa mu Rwanda akirangiza igihano cye.

Teganya w’imyaka 47 ashinjwa kugira uruhare mu rupfu rw’Abatutsi barindwi no gufata ku ngufu abandi bagore batanu.

Uyu mugabo yakatiwe n’urukiko rwo muri Boston azira guhisha uruhare yaba yaragize muri Jenoside yakorewe Abatutsi ubwo yakaga ubuhungiro.

Ubwo yasabaga ubuhungiro, Teganya yatangaje ko nta cyaha nta kimwe akurikiranweho kijyanye na jenoside.

Umuvugizi w’umunyamategeko wa Amerika, Christina DiLorio-Sterling yagize ati “ Bwana Teganya yahanwe ku bw’uburiganya mu nzego z’abainjira n’abasohoka. Yabeshye ku wo ari we kugira ngo ahabwe ubuhungiro. Dukurikije ibimenyetso twabonye mu gihe cy’urubanza, uregwa yakoze ibyaha bikomeye mu gihe cya jenoside yakorewe Abatutsi. Iyo bigeze ku ngingo ya jenoside, amategeko ya Amerika arengera inzirakarengane, ntarengera abazirenganyije.”

Ibi biravugwa mu gihe Teganya yasabaga ko yafungirwa muri Amerika aho koherezwa mu Rwanda. Umunyamategeko we, yabwiye kimwe mu binyamakuru byo muri Amerika ko umukiliya we yifuza gufungirwa muri Amerika aho azabasha gusurwa n’umuryango we.

Mu gihe cya Jenoside Teganya yari muri sitaje (stage) mu bitaro by’i Butare aho bivugwa ko ari ho yakoreye ibyaha akekwaho nk’uko byagarutsweho mu rukiko kuri uyu wa 1 Nyakanga 2019.

 

Izindi wakunda

Bwiza.com
error: Alert: Ntabwo byemewe!!