bwiza.com
Ahabanza » Nyamasheke: Abahinzi b’ibigori bafite impungenge z’igihombo bashobora kugwamo
Amakuru Politiki

Nyamasheke: Abahinzi b’ibigori bafite impungenge z’igihombo bashobora kugwamo

Abahinzi   1418 bibumbiye muri koperative KODIKA bahinga ibigoli n’indi myaka mu bishanga bikora ku migezi ya karundura na Kigoya mu murenge wa Kanjongo mu karere ka Nyamasheke bavuga ko bishatsemo ibisubizo biyubakira uruganda ruciriritse rwa kawunga muri santere y’ubucuruzi ya  Kirambo muri uyu murenge,nyuma kimwe n’abandi bacuruzi bose bayicururizamo babwirwa ko aho bakorera ari mu gishanga nta nzu bagomba kuhazamura, bakaba bari mu gihirahiro n’impungenge zo kugwa mu gihombo bagasubira mu bukene.

Mu kiganiro na Bwiza.com, n’agahinda kenshi,bavuze ko bafashe icyemezo cyo kwishyira hamwe no kubyaza umusaruro ibi bishanga bahinga kuri hegitari 71 ku gitekerezo cy’ubuyobozi bw’umurenge wabo muri 2011 kuko byahingwaga mu kajagari ntibitange umusaruro ugaragara,aho bamariye kwishyira hamwe babibyaza umusaruro w’ibigoli utangaje ku buryo basarura toni zirenga 50 zinjira muri koperative,izi akaba ari 30% gusa  by’umusaruro wose babona kuko ngo 70% byawo babitahana,kandi mbere kubera akajagari batazi n’umusaruro wavagamo.

Ibi ngo babigezeho nyuma y’uko mbere bagihinga mu kajagari bamwe bahingagamo ibigoli abandi bahinzemo ibijumba,abandi amasaka,abandi imyumbati izamaramo umwaka urenga,abandi imboga,amateke n’ibindi ugasanga barakena aho gutera imbere ariko bamaze gufata izi ngamba  ngo barahingira igihingwa rimwe cyavamo hakajyamo ikindi, bakoresheje ifumbire neza n’imbuto z’indobanure, hagahingwa inshuro 3 mu mwaka mu gihe mbere utari no kumenya inshuro hahingwa mu mwaka kubera aka kajagari bakoreragamo.

Gusa ngo bamaze guhinga ibigoli byinshi baje gusanga na byo bishobora kubahombera kuko hari abo babihaga bakabambura amamiliyoni n’ababishyuye bigatinda ntibunguke,bunguka igitekerezo cyo  kugura imashini zibisyamo kawunga, n’inzu yo gushyiramo uwo musaruro wose bongera n’ikibanza bubaka inzu y’izo mashini,batangira gukoresha n’abakozi aho bakoresha batatu bahoraho na ba nyakabyizi bose bahembwa.

Nirere Clénie umwe muri bo yagize ati’’ byaratwunguye cyane dutangira kwiteza imbere bigaragara mu ngo zacu n’igishanga gitanga umusaruro ufatika, ibyo kuvangavanga imyaka turabisezerera tumaze kwibumbira hamwe muri iyi koperative,ariko tugira ikibazo cy’ibigoli byangirikiraga mu bwanikiro kubera ubwinshi n’abatuguriye ntibigende neza,dukusanya imbaraga tugura imashini zisya kawunga, tugura ikibanza cy’inzu yazo,n’iy’ubuhunikiro,hari n’ahandi twateganyaga kwagurira uruganda rwacu ruciriritse twumva tugiye kurushaho gukira.’’

Yarakomeje ati’’ icyaje kudukoma mu nkokora ariko ni uko twatangiye gushaka kwegera ibigo by’imari ngo biduhe inguzanyo nk’uko ubuyobozi bubidushishikariza,uwo twaguze inzu twajya guhinduza icyangombwa cy’ubutaka ubuyobozi bukavuga ngo ntibishoboka ni mu gishanga n’aho twari twaguze mbere tukahaburira ibyangombwa.

Ntidushobora kugira icyo dutangaho ingwate mu bigo by’imari mu byo dufite byose ngo baduhe amafaranga kuko ngo imitungo yacu yose  ihari nta byangombwa tuyifitiye, akarere ntikanatubwira aho iyi santere y’ubucuruzi izimukira ngo dutangire twitegure, nta bushobozi dufite bwo kwimuka ngo tube twagira ahandi tujya gukorera, mbese turi mu gihirahiro gkaze.’’

Umuyobozi w’iyi koperative Nyarushumba Etienne  avuga ko yifuza ko umuyobozi w’aka karere Kamari Aimé Fabien yabegera bakamugezaho ibi bibazo nk’uko yabikoraga akiri Gitifu w’umurenge wabo kuko byose babikoze ku nama ze, akaba yabafasha  niba ari ukuhava bakabona ahandi heza hegereye ibikorwa byabo kandi habafasha kunguka, bagahabwa n’ubufasha kuko imbaraga z’amafaranga zisa n’izabashizeho.

Ati’’ twavuye habi mu bukene ubu twinjizaga arenga 3.000.000 buri kwezi kandi ibigoli byinshi abanyamuryango bagiye kubyikenuza ahandi,ugize ikibazo tukamugurira, nta muturage wahingaga ibigoli ngo ahangayike kandi ni twe twenyine twari twageze kuri ibi muri uyu murenge wose.

Badufashe ntidusubire inyuma rwose kandi birashoboka igihe batwegera bakatugira inama kuko kwigira ni cyo n’umukuru w’igihugu Paul Kagame adusaba kandi twari twabigezeho,ariko kuba inyubako twaguze ishaje cyane ntitube twayisana, nta faranga ry’iguzanyo twabona bigiye kudusubiza inyuma rwose.’’

Umuyobozi w’aka karere Kamari Aimé Fabien avuga ko kuba ari mu gishanga ho byemejwe bidahinduka santere y’ubucuruzi yose izahimurwa,aho izajya bakihashaka, na  bo akavuga ko agiye kubegera bakaganira akabagira inama y’icyo bakora ngo badahomba, nibanahava bazakorere koko aharushijeho kubaha icyizere cy’iterambere. 

Izindi wakunda

Bwiza.com
error: Alert: Ntabwo byemewe!!