bwiza.com
Ahabanza » Scaphism, igihano kimaze ibinyagihumbi kitazibagirana mu mateka y’isi
Amakuru Amateka n'umuco

Scaphism, igihano kimaze ibinyagihumbi kitazibagirana mu mateka y’isi

Kuva mu bihe bya kera, ubuzima bw’ikiremwamuntu ntibwahabwaga agaciro kamwe. Muti nshingiye kuki? Ubwo nasomaga imbuga zitandukanye kuri murandasi, nabonye ingingo ivuga ku buryo bwo kwica nk’igihano gihabwa umuntu wakoze amakosa ariko akomeye. Ijambo ‘Scaphism’ ryiganzaga mu nyingo nyinshi nanyuzagamo amaso, nange ngira amatsiko yo kumenya ubusobanuro n’inkomoko by’iri jambo.

Nasanze ‘Scaphism’ cyangwa se ubwato ari cyo gihano cy’urupfu cyababazaga kurusha ibindi tuzi ubu ngubu ku isi. Iri jambo ubwaryo rikomoka kuri ‘skáphe’ ryo mu Rugiriki, risobanura ‘kwanika umuntu ku ka rubanda’ Ni uburyo bwo kwica bwakoreshwaga n’Abaperise mu myaka ya za 500 mbere y’ivuka rya Yesu.

Byakorwaga mu buryo butatu:

Uburyo bwa mbere ni ugufata umunyabyaha, agahambirirwa hagati y’ubwato cyangwa imivure ibiri ingana, hagasigara, umutwe, amaboko guhera mu nkokora n’amaguru guhera mu mavi.

Uburyo bwa kabiri ni uguhambirira ugomba kwicwa mu muvure cyangwa ubwato bakoresheje imigozi gusa.

Uburyo bwa gatatu bwari uguhambirirwa ku giti hifashishijwe imigozi. Bahambiraga umuntu umwe cyangwa babiri bafatanye.

Ntibyabaga bihagije. Bamaraga guhambira umunyabyaha wabo, bakamujyana ku gasozi cyangwa mu mazi, ahantu habona izuba mu buryo bworoshye. Nyuma yo guhambirirwa mu bwato cyangwa se mu muvure, bagaburiraga ugomba kwicwa amata ndetse n’ubuki byinshi akagwa ivutu, ibisigaye bakabimumena mu maso, ku maboko no ku maguru; za ngingo zabaga zasigaye hanze.

Kubera iki babigenzaga batya?

Igihe babaga bajyanye umunyabyaha cyangwa se umunyamakosa ku izuba, amata n’ubuki babisutse mu maso no kuri za ngingo zindi, nta kabuza byagombaga kuma, amasazi, intozi, inshishi, ibimonyo n’utundi dukoko byagombaga kuza bikarya mu maso, ku maboko no ku maguru bishaka kurya wa buki n’amata. Ni ko utu dukoko twakomezaga kwinjira mu matwi, mu mazuru, mu kanwa no mu maso h’uzirikiwe ku karubanda, mu izuba ry’igikatu.

Ufite inshingano zo kwica yabonaga ya mata n’ubuki byashize, akazana ibindi, akamugaburira, akanamumena ibindi kuri za ngingo.

Impamvu bagaburirwaga bakagwa ivutu

Iyo umuntu yaguye ivutu, akenera cyane kujya ku musarane. Ntabwo bashoboraga kubona uko bibohora ngo bajye kwituma, ahubwo babikoreraga mu muvure cyangwa mu bwato bazirikiwemo. Ibi byatumaga ubuzima bukomeza kubabangamira, uwo mwanda (inkari n’amazirantoki) bikababoza kuko babaga babiryamyemo, bakabyirirwamo bakanabiraramo.

Nyuma y’ibi, ubwo uwicwa yabaga yariwe bihagije, nta mazi yo kunywa yabonye, mbese nta gatege afite, ka kato ko hejuru bakamuvanagaho. Icyakurikiragaho ni ukumureka agakomeza akaborera aho ngaho.

Amakuru ku bwicanyi bwa ‘Scaphism’ tuyakomora mu gitabo cyitwa Life of Artaxerxes cyanditswe n’Umugiriki witwaga Plutarch. Kivuga ku mateka y’umusirikare w’Umuperise witwaga Mithridatum. Yishwe muri ubu buryo nyuma yo kurakaza umwami Artaxerxes II Mnemon. Byabaye mbere y’ivuka rya Yesu, hagati y’umwaka wa 404 na 358.

Izindi wakunda

1 Igitekerezo

Ngutete 05/07/2019 6:06 am at 6:06 am

None ibi urikubyandika kugirango mumfu abanyarwanda bapfuye nubugome babikorana hiyongeremo nibise 🤔🤔🤔

Subiza

Tanga Igitekerezo

Bwiza.com
error: Alert: Ntabwo byemewe!!