bwiza.com
Ahabanza » Nyamasheke: Imodoka isanzwe itwara imirambo yafashwe itwaye magendu
Amakuru

Nyamasheke: Imodoka isanzwe itwara imirambo yafashwe itwaye magendu

 

Mu karere ka Nyamasheke, mu burengerazuba bw’igihugu hafatiwe imodoka isanzwe itwara imirambo ipakiye magendu. Iyi modoka yafashwe ku bufatanye bwa Polisi y’igihugu n’abaturage.

Nk’uko byemejwe n’umuvugizi wa Polisi y’igihugu CP John Bosco Kabera , yatangaje ko iyi modoka ifite puraki nomero RAD 819 G yafashwe mu ijoro rya cyeye ubwo yavaga I Rusizi igana Kigali. Iyi modoka yari yajyanye umurambo I Rusizi kuwa 4 Nyakanga 2019.

Iyi modoka isanzwe itwara imirambo yavuye Rusizi ipakiye megendu ziganjemo imyenda ya caguwa ndetse n’inkweto. Iyi modoka yari itwaye amabaro atatu y’imyenda ndetse n’indi mifuka irimo inkweto.

Mu kiganiro umuvugizi wa Polisi y’u Rwanda CP John Bosco Kabera yagiranye na RBA yagize ati’’Imodoka ya Benzi ifite puraki RAD 819 G mu ijoro ryakeye muma saa yine n’igice yaturukaga I Rusizi yerekeza I Kigali iza gufatirwamo magendu irimo imyenda ya caguwa ndetse n’inkweto’’

CP Kabera yakomeje avuga ko bafashe iyi modoka ku bufatanye n’abaturage. Yagize ati’’ Mu rwego rw’imikoranire n’abaturage bakomeza kuduha amakuru y’ibi bintu cyane cyane bijyanye na magendu . Murabizi ko iyi myenda ya caguwa yaciwe mu gihugu ntabwo icuruzwa ariko ibihugu duturanye hirya no hino birayicuruza’’

Uyu muvugizi akaba avuga ko kubera duturanye n’ibihugu biyicuruza, abantu bashaka uburyo bayinjiza mu gihugu. Akaba asobanura ko kuba imodoka itwara imirambo ijya mu mugambi wo gutwara magendu abantu bagomba kwitondera.

Ubundi ntibisanzwe ko imodoka nk’izi zigaragara mu bikorwa bya magendu, abantu bakaba bafite impungenge ko n’izindi modoka nk’izitwara abarwayi zishobora kujya mu bikorwa nk’ibi. Gusa umuvugizi wa polisi yamaze abantu impungenge avuga ko polisi yafashe ingamba zitandukanye zo gukumira ibi byaha ku bufatanye n’abaturage.

Kugeza ubu , umushoferi wari utwaye iyo modoka ndetse n’abantu babiri bacumbikiwe kuri sitasiyo ya polisi ya Ruharambuga .

Urwego rushinzwe ku rwanya magendu muri cyigo cy’imisoro n’amahoro( RRA) ku bufatanye na polisi bagiye gukora iperereza kugirango abafashwe bakanirwe urubakwiye.

Nkurunziza Viateur @ Bwiza.com

Izindi wakunda

Bwiza.com
error: Alert: Ntabwo byemewe!!