bwiza.com
Ahabanza » Bamwe mu baburiye ababo mu mpanuka z’indege za Boeing ntibakozwa indishyi z’akababaro bemerewe
Amakuru Politiki

Bamwe mu baburiye ababo mu mpanuka z’indege za Boeing ntibakozwa indishyi z’akababaro bemerewe

Imiryango 15 yo mu gihugu cya Kenya yaburiye ababo muri Werurwe mu mpanuka y’indege ya Ethiopian Airlines yo mu bwoko bwa Boeing Max 737, yanze indishyi y’akababaro sosiyete ya Boeing iteganya gutanga, ahubwo ivuga ko igiye kujyana iki kigo mu butabera.

Umwunganizi w’iyi miryango mu mategeko, Irungu Kangata, yasobanuye ko abo aburanira bamaganye ibiganiro byabera hanze y’urukiko. Sosiyete ya Boeing muri iki gihe ikaba yugarijwe n’imanza nyinshi zatangijwe kuva indege ebyiri zayo zo mu bwoko bwa Boeing 737 Max zikoreye impanuka zigahitana abantu benshi.

Imiryango y’abari mu ndege yo mu bwoko bwa Boeing 737 Max ya sosiyete itwara abantu yakoreye impanuka mu mazi yegereye igihugu cya Indonesia bo barashaka kumvikana na Boeing.

Ariko, abafite ababo baguye mu mpanuka ya Boeing 737 Max ya sosiyete ya Ethiopian Airlines bo baracyategereje byinshi bishobora kumenyekana ku byerekeye izi mpanuka z’izo ndege ebyiri nk’uko iyi nkuru dukesha Ijwi rya Amerika ikomeza ivuga.

Kuwa Gatatu ushize nibwo sosiyete ya Boeing yatangaje ko yiteguye gutanga miliyoni 100 z’amadolari yo gufasha imiryango y’ababuriye ababo muri izi mpanuka uko ari ebyiri zahitanye abantu 346.

 

Izindi wakunda

Bwiza.com