bwiza.com
Amakuru Politiki

Impunzi zisaga 20 z’Abarundi zimaze kwicirwa muri Tanzania

Nyuma y’aho impunzi ibihumbi z’Abarundi zihungiye muri Tanzania kuva mu 2015, bitangazwa ko izisaga 20 zaburiyeyo ubuzima, harimo n’izagiye ziburirwa irengero.

Raporo itangwa n’itsinda ry’impunzi z’Abarundi ry’abakorerabushake baharanira uburenganzira bwa muntu, igaragaza ko abagiye bicwa, rimwe na rimwe babaga bafashwe na polisi cyangwa se bagashimutwa.

Iri tsinda ry’impunzi zibarizwa mu nkambi ya Nduta, ritangaza ko uyu mubare w’abishwe ari uw’agateganyo, ko ushobora guhinduka mu gihe hari amakuru agikusanywa.

Nk’uko SOS Medias/ Burundi ibitangaza, ngo bamwe bagiye bicwa bagiye gushaka inkwi mu ishyamba.

Uku kubura ubuzima kwa bamwe ndetse no kuburirwa irengero, iri tsinda ribishinja inzego za Leta ya Tanzania na polisi. Umwe muri bo ati “Abantu basaga icumi bagiye bafatwa na polisi nyuma bakabonwa bapfuye”.

Bavuga ko mu nkambi z’impunzi muri Tanzania hagiye hagaragara Imbonerakure za CNDD FDD, izi zikaba zishyirwa mu majwi ko arizo zica bamwe abandi zikabashimuta.

Ati” Abo twabaruye ntabwo bari munsi ya 10 bishwe barashwe n’abantu bitwaje intwaro kandi banavuga Ikirundi”.

Ababuriye ababo muri izi nkambi kimwe n’izindi mpunzi muri rusange, bakaba basaba Leta ya Tanzania ndetse na UNHCR kurushaho kubacungira umutekano kandi no gukurikirana ababa baragize uruhare mu iyicwa rya bagenzi babo.

 

Izindi wakunda

Bwiza.com
error: Alert: Ntabwo byemewe!!