bwiza.com
Ahabanza » Moise Katumbi agiye kujyana mu nkiko ikinyamakuru cyamushinje guha ruswa umunyezamu wa Zimbabwe
Amakuru Politiki

Moise Katumbi agiye kujyana mu nkiko ikinyamakuru cyamushinje guha ruswa umunyezamu wa Zimbabwe

Umunyapolitiki Moise Katumbi, akaba n’umuherwe nyiri ikipe ya TP Mazembe yo muri Repubulika iharanira Demokarasi ya Congo, agiye kujyana ikinyamakuru La Gazette de la Grande Ile cyo muri Madagascar giherutse kumushinja guha ruswa umunyezamu wa Zimbabwe ngo yitsindishe mu mukino wahuje igihugu cye na Congo kuwa 30 Kamena bikarangira ari ibitego bine bya Congo ku busa bwa Zimbabwe.

Umujyanama mu mategeko wa Moise Katumbi witwa Gregory Ernes yatangaje ko inkuru y’Ikinyamakuru La Gazette de la Grande Ile yo kuwa 03 Nyakanga yavugaga ko Congo ishobora kwirukanwa mu irushanwa, igamije gusebya no gushyira icyasha ku cyubahiro cya Katumbi.

Gregory Ernes akavuga ko ku itariki yavuzwe n’icyo kinyamakuru ko Moise Katumbi yaba yarabonaniyeho n’umunyezamu wa Zimbabwe mu Misiri akamuha ruswa, Moise Katumbi yari ari I Buruseli, nk’uko byemezwa na passport ye, akaba nta kuntu yari kubonana imbonankubone n’umukinnyi uwo ari we wese.

Ku kijyanye no kubonana n’abakinnyi ba Congo, Ernes avuga ko Moise Katumbi ntaho yigeze ahurira nabo, ko yakurikiranye umukino wa mbere mu matsinda hagati ya Congo na Uganda. Ngo yari mu Misiri kandi ku butumire bwa CAF nk’ugize komisiyo ishinzwe gutegura CAN, ndetse nk’umuyobozi w’ikipe ya TP Mazembe, imwe muri eshanu za mbere muri Afurika.

Umujyanama wa Katumbi mu mategeko akaba asaba CAF, yari yamutumiye, kwemeza ku mugaragaro ko nta perereza riri gukorwa imbere kuri Katumbi nk’uko ikinyamakuru cyabitangaje, ndetse anayisaba gufatira ibihano ababa bakora muri CAN bari inyuma y’ayo makuru bita ayo gusebya Katumbi.

Uyu mugabo akaba akomeza avuga ko ikirego kibashinja gusebanya kizaregwa abantu bose bari inyuma y’ayo makuru kandi ko guha umwanya Katumbi mu kinyamakuru La Gazette de la Grande Ile ngo yisobanure bidahagije.

 

Izindi wakunda

Bwiza.com