bwiza.com
Amakuru mashya Politiki

Ubutumwa bw’uhagarariye Ubwongereza muri Amerika bushobora kuzana agatotsi mu mubano w’ibihugu byombi

Ambasaderi W’Ubwongereza muri Leta Zunze Ubumwe z’Amerika, Sir Kim Darroch yandikiye igihugu cye ubutumwa bw’ibanga bunenga imikorere y’ubuyobozi bw’igihugu akoreramo ariko ku bw’amahirwe make bujya ahabona. Ibi bishobora kuzana agatotsi mu mubano w’ibi bihugu bihuriye mu muryango wa NATO.

Amakuru dukesha The Telegraph avuga ko mu butumwa Sir Kim Darroch yandikiye kuri ’email’ yavugaga ko White House, ingoro ya Trump ikora nabi ku buryo bw’umwihariko.

Ubu butumwa bwahishuriwe ikinyamakuru  Mail on Sunday cyo mu Bwongereza ariko uwabigizemo uruhare ntabwo yatangajwe. Ibiro bya Minisiteri y’Ububanyi n’Amahanga muri iki gihugu byatangaje ko guhishurira ubu butumwa iki kinyamakuru ari ugushaka guteza ibibazo.

Ubutumwa bukubiye muri izi email buvuga ku ntege nke z’imiyoborere ya Trump nko kuba idafite icyerekezo kandi iciyemo ibice. Nta kizere Darroch ayifitiye.

“Mu by’ukuri ntitwizeye ko ubu butegetsi buzageraho bukajya mu buryo birenzeho; bukagabanya gukora nabi, bukagira icyerekezo, bukagabanya gucikamo ibice, bukabana n’amahanga mu buryo busobanutse no kongera ubushobozi”. Sir Darroch.

Perezida Donald Trump yagiriye uruzinduko mu Bwongereza muri Kamena. Bamwe barabyishimiye, abandi ntibabishyigikira harimo umubare munini w’Abongereza bigaragambije. Mu batararwishimiye kandi harimo na Meya w’umugi wa Londre, Sadiq Khan wanenzwe na Trump ubwo yari akiri mu ndege yerekeza muri iki gihugu.

Sir Darroch avuga ko n’ubwo Trump yasuye igihugu cye, bidakuraho ko Amerika ikomeje kureba cyane ku nyungu zayo; mbese ingoma ye yagaragaje kwikunda cyane; ibintu atitezeho guhinduka.

Ubu butumwa bwa Darroch bwagiye ahagaragara ni ubwo kuva mu 2017 kugeza muri Kamena uyu mwaka. Leta Zunze Ubumwe z’Amerika nta cyo zirabuvugaho.

Izindi wakunda

Bwiza.com
error: Alert: Ntabwo byemewe!!