bwiza.com
Amakuru Ubukungu

Umurundi uri mu buhunzi mu Rwanda yahishuye inzira itoroshye yanyuzemo ngo yibesheho

Ni impunzi y’Umurundi yahungiye mu Rwanda mu mwaka 2015, izina rye ryahinduwe ni Murundi Salvator ku bw’impamvu z’umutekano we, n’ubwo atariteza imbere ku rwego yifuza ariko hari aho ageze yishimira.

Salvator afite inzu akodesha agacururizamo inyama (Boucherie) nyuma yo kumara igihe aba mu rugo rw’undi muntu, abonye ko imibereho igoye cyane, afata icyemezo cyo gushaka icyo akora. 

Yagize ati “ Nahunze mu 2015 nakirwa mu muryango i Kigali, nawumazemo amezi atandatu. Kuba mu muryango udafite icyo ukora ni ikintu gikomeye.

Kuva mu Ugushyingo 2016, niyemeje kuva mu muryango njya kwikodeshereza inzu y’ibihumbi 120 ariko yari ihenze cyane. Narahinduye mpita njya gutura mu gace katari kure y’umujyi wa Kigali, mba mu nzu y’ibihumbi 40 Frs, birumvikana harimo ikinyuranyo cy’ibihumbi 80”.

Salvator Ndinzemenshi yazunguje umutwe ashaka icyo yakora kugira ngo abeho n’umuryango we. Yaje kubona umutoza w’umupira w’amaguru wo mu Rwanda ngo yagemuriraga inyama, biza kumufasha kubona igishoro gike yaje kongeranya n’amafaranga yakuye mu bikoresho byo mu rugo yari yarasize mu Burundi, yagurishije.

Igishoro yari afite cy’ibihumbi 400 y’amanyarwanda cyamufashije gushinga busheri, ubu agura inka akayibaga inyama akazigurisha.

Ubucuruzi akora buramutunze n’umuryango we

N’ubwo hari bamwe mu mpunzi usanga biyemeza gusabiriza cyangwa gutegereza ibyo bazagenerwa, we avuga ko ubu abasha kwiyishyurira inzu abayemo n’umuryango we, ibyo kurya, kwishyurira abana be bane amashuri, kwishyura abakozi babiri akoresha muri busheri, ushinzwe isuku n’utema inyama. Avuga ko ubu bucuruzi bumunyuze ngo kuko iyo ahombye ahita abibona, yanakunguka akarara abimenye.

Avuga ko iyo amaze kwishyura buri kimwe cyose, asigarana amafaranga 3000Frs yizigamira buri munsi. Umwe mu bakiriya be aganira na RPA, yagize ati “Ndateganya kujya kwa Murundi, yakira neza abakiriya kandi akagira n’inyama nziza”.

Iyi mpunzi y’Umurundi ivuga ko ihura n’imbogamizi y’igishoro gike, ko ubu hari ibikoresho by’ibanze asabwa n’ubuyobozi bw’aho akorera, birimo nk’imashini ikata inyama ikoreshwa n’umuriro w’amashanyarazi, none akaba asaba imiryango ifasha impunzi z’abarundi kuba yamufasha ikamuha inguzanyo azagenda yishyura buhorobuhoro.

 

 

Izindi wakunda

Bwiza.com