bwiza.com
Ahabanza » Burundi: Impuguke mu buvuzi bw’amaso y’Umunyarwanda yamaze icyumweru gisaga muri kasho za SNR
Amakuru Politiki

Burundi: Impuguke mu buvuzi bw’amaso y’Umunyarwanda yamaze icyumweru gisaga muri kasho za SNR

Umuganga w’Umunyarwanda wari umaze iminsi yaratawe muri yombi mu gihugu cy’u Burundi yarekuwe mu mpera z’icyumweru gishize ariko ntihatangwa ibisobanuro ku mpamvu yari yatumye atabwa muri yombi.

Ni umuganga (docteur) bivugwa ko yitwa Regis Mfuranzima, uri mu kigero cy’imyaka 30, akaba impuguke mu buvuzi bw’amaso (ophthalmologist), ukora kuri Clinic iherereye ahitwa Gishubi muri Gitega.

Biravugwa ko yatawe muri yombi kuwa Mbere, itariki 24 Kamena, ahagana saa munani afatiwe mu Isoko rya Gishubi, akaza kurekurwa kuwa Gatanu ushize, itariki 05 Nyakanga nta bisobanuro ku mpamvu yari yatumye afatwa nk’uko iyi nkuru dukesha SOS Medias Burundi ikomeza ivuga.

Biravugwa ko ubwo yatabwaga muri yombi, yajyanywe na moto ebyiri z’igipolisi zikamujyana muri kasho y’urwego rw’igihugu rw’ubutasi (SNR) muri Gitega. Gusa, bivugwa muri iyi nkuru ko yari yatawe muri yombi kubera ko ari Umunyarwanda.

Iyi nkuru irakomeza ivuga ko nyuma yo gutabwa muri yombi kuwa 24 Kamena, bukeye bwaho umuyobozi w’ivuriro akoraho, Bosco Nduwimana, nawe yatawe muri yombi na SNR ubwo yajyaga gusura umukozi we.

Nyuma bombi boherejwe muri kasho ya SNR I Bujumbura bavanywe muri Gitega. Umwe mu batanze amakuru ati: “Kuwa Kabiri, itariki 02 Nyakanga, twabasanze muri kasho ya SNR I Bujumbura”.

Mfuranzima na Nduwimana bakaba baraje kurekurwa kuwa Gatanu ushize, Itariki 05 Nyakanga.

 

 

Izindi wakunda

Bwiza.com
error: Alert: Ntabwo byemewe!!