bwiza.com
Ahabanza » ICC igiye gutanga umwanzuro ku rubanza rwa Gen. Bosco Ntaganda
Amakuru Politiki

ICC igiye gutanga umwanzuro ku rubanza rwa Gen. Bosco Ntaganda

Urukiko Mpuzamahanga Mpanabyaha (ICC) kuri uyu wa Mbere, itariki 08 Nyakanga 2019, nibwo rutangaza umwanzuro warwo mu rubanza rumaze igihe rukurikiranyemo Umunyekongo, Gen. Bosco Ntaganda, wahoze ari umukuru w’inyeshyamba.

Urukiko kuri uyu wa Mbere ruratangaza niba mu iburanisha rwarasanze Ntaganda ari umwere cyangwa ahamwa n’ibyaha nta gushidikanya.

Gen. Bosco Ntaganda yari akurikiranweho ibyaha bigera muri 13 by’intambara, birimo; ubwicanyi no kugerageza ubwicanyi, kugaba ibitero ku basivili, gufata ku ngufu, kugira abantu abacakara b’imibonano mpuzabitsina, gusahura, gukura abaturage mu byabo n’ibindi.

Bosco Ntaganda kandi yari akurikiranweho ibyaha bitanu byo kwibasira inyokomuntu birimo Ubwicanyi, kugerageza ubwicanyi, gufata ku ngufu, kugira abantu abacakara b’imibonano mpuzabitsina gukura abaturage mu byabo ku ngufu, no gutoteza abantu. Ni byaha ashinjwa gukorera mu Ntara ya Ituri, muri Congo hagati ya 2002 na 2003.

Urubanza rwe rwatangiye kuwa 02 Nzeri 2015, rupfundikirwa kuwa 30 kanama 2018. Yari afungiye muri gereza ya ICC kuva yahunga ava muri Congo mu 2013 nyuma y’imirwano ikomeye yahuje ingabo ze n’iza Gen Sultan Makenga.

Icyo gihe yahungiye mu Rwanda asaba ubuhungiro muri Ambasade ya Leta Zunze Ubumwe za Amerika I Kigali, aho yavuye yohererezwa ICC ngo aburanishwe.

 

 

Izindi wakunda

1 Igitekerezo

ICC yahamije Bosco Ntaganda ibyaha 18 by’intambara n’ibyibasiye inyokomuntu - bwiza.com 08/07/2019 11:15 am at 11:15 am

[…] ICC igiye gutanga umwanzuro ku rubanza rwa Gen. Bosco Ntaganda […]

Subiza

Tanga Igitekerezo

Bwiza.com