bwiza.com
Ahabanza » Rusizi/ Rwimbogo: Ibyo tumaze kwigezaho ni urugero nyarwo rwo kwibohora- Abaturage
Amakuru Politiki

Rusizi/ Rwimbogo: Ibyo tumaze kwigezaho ni urugero nyarwo rwo kwibohora- Abaturage

Abaturage bo mu Murenge wa Rwimbogo mu karere ka Rusizi bahamya ko  ibyo bamaze kwigezaho mu myaka 25 u Rwanda rumaze rwibohoye bishimangira imvugo yabo ko ubumwe bw’Intore bunoza intambwe, ubu bakaba bafite byinshi bashima Leta.

Babitangaje ubwo batahaga  bimwe mu bikorwaremezo bubatse ubwabo mu mwaka w’imihigo 2018-2019, birimo iyagurwa ry’umurenge wabo  nyuma yo kubona ko bahererwaga serivisi ahafunganye ntibazihabwe neza mu nyubako y’ibyumba 5 gusa kandi abakozi  ari benshi ,bahitamo kongeraho ibyumba 3 byuzuye bitwaye amafaranga2.541.200, ngo bigiye gutuma abakozi bakorera ahagutse babahe serivisi zirushijeho kunoga,cyane cyane ko  kubura aho bakorera bamwe mu bakozi bakoreraga mu nyubako za SACCO abaturage ntibamenye aho babashakira,ariko ubu ngo bagiye kujya bababonera aho bazi bakorera, n’ikibazo cya internet cyabaga aho bakoreraga  cyadindizaga imikorere kikaba gihise gikemuka.

Abaturage bishimira ko ibyo bamaze kugeraho babigizemo uruhare

Batashye kandi ibagiro rito ry’isoko rya Gishoma ryavuguruwe ku mafaranga 1.100.000 kuko ryari ryarubatswe mu 1978 ari rito cyane ritakinajyanye n’igihe n’umubare w’abahakenera inyama barimo n’abanyekongo, bagiye kujya bahererwa inyama ahisanzuye hanasukuye,ibi bikaba byiyongereyeho imirimo yagiye ikorwa kuri buri kagari irimo gusana inyubako z’ibiro by’utugari,gushyiramo amashanyarazi aho atari,ndetse na poste de santé biyujurije ku bufatanye na LODA,yuzuye itwaye 5.200.000,uruhare rwabo rukaba ntagereranywa,ikaba igiye gufasha abaturukaga kure cyane bagiye gushaka serivisi zimwe na zimwe ku kigo nderabuzima cya Mushaka.

Ikindi gikomeye cyakozwe cyari gikenewe n’abaturage cyane ni ugutaha icyumba kizajya gitangirwamo serivisi  z’ubuvuzi ku nka nyuma y’uko muri uyu murenge hatangijwe mituweli y’inka, ngo bizafasha aborozi b’ubushobozi buke kuvuza inka zabo mu bwisungane magrirane n’abandi borozi basanzwe bifite, bikazakuraho imfu z’inka za hato na hato,bigaha ingufu  gahunda ya girinka kuko hari abazihabwaga bakazanga ngo zitazabapfiraho kubera kubura uko bazivuza zirwaye.

Ibi byose kimwe n’ibikorwa by’iterambere mu buhinzi n’ubworozi bihagaragara,umunyamabanga nshingwabikorwa w’uyu urenge,Nyirangendahimana Mathilde avuga ko ari imbuto zo kwibohora.

Ati’’ ibi byose ntibyari gushoboka iyo hatagira abana b’u Rwanda barubohora ku ngoyi zose zari ziruboshye zirimo amacakubiri n’ivangura, n’ibindi byose byabuzaga abaturage gutera imbere, ubu bahagaze neza mu mibereho,baratekanye,bariyunze ni yo mpamvu n’ibi byose dutaha biba byavuye mu mbaraga zabo ubwabo kandi biteguye kubirinda no kubyongera.’’

Kanakuze Marie Thérèse uzwiho ibikorw biteza imbere ubumwe n’ubwiyunge muri uyu murenge na we ati’’ ntibyari gushoboka abaturage bakiri mu rwikekwe,kwishishanya n’ibindi byabatanyaga bikabadindiza ariko Leta yabanje kubaka ubumwe bwacu tukabuheraho twiteza imbere ni iyo gushimwa cyane kuko ibi byose tugaragaza bitari kugerwaho turyana nka kera.’’

Nahayo Vincent ushinzwe iterambere ry’ubukungu n’imibereho myiza y’abaturage mu kagari ka Muhehwe, yishimira umusaruro yakuye muri kaminuza  mu buhinzi kuko ubu ari umuhinzi ntangarugero w’imboga,imbuto n’urutoki akanabyigisha abo ayobora,akavuga ko mbere higaga mbarwa,kwibohora kukaba kwarabafashije kwiga ari zo mbuto basarura mu bumenyi bungutse batari kugira igihugu kikiboshye kandi bazakomeza kongera uko ibihe biha ibindi.

Umuyobozi w’aka karere wungirije ushinzwe iterambere ry’ubukungu,Kankindi Léoncie wanafashije guhemba indashyikirwa muri uyu murenge zafashije kugera ku byo bishimira uyu mwaka, yabashimiye aho bigejeje ubwabo,abasaba kubungabunga ibyo bagezeho no guharanira kubyongera, kwibungabungira umutekano no kudaha urwaho uwashaka gusubiza inyuma abanyarwanda no gusenya ibyo bamaze kugeraho,abizeza ko ibyo batarageraho kubera ko birenze ubushobozi bwabo  bazajya babifashwamo,ariko ibyo bagezeho bakabibyaza umusaruro ugaragara. 

Ibiro by’Umurenge byaguwe n’abaturage
Abayobozi banyuranye bifatanya n’abaturage mu muhango wo kwishimira ibyagezweho

Izindi wakunda

Bwiza.com
error: Alert: Ntabwo byemewe!!