bwiza.com
Ubuzima

Umubyibuho ukabije utera kanseri kurusha kunywa itabi: Ubushakashatsi

 

Ikigo cy’Abongereza gikora ubushakashatsi ku ndwara ya kanseri kitwa CRUK, cyagaragaje ko umubyibuho ukabije ushobora gutera kanseri zitandukanye ku kigero cyo hejuru kurusha uko zaterwa no kunywa itabi ryinshi.

Iki kigo, cyatangaje ko umubyibuho ukabije utera kanseri y’amara, impyiko,udusabo tw’intanga ngore ndetse n’iz’umwijima kurusha uko zaterwa no kunywa itabi.

Ubu bushakashatsi kandi bugaragaza ko abantu bafite ibiro bikabije, baba bafite ibyago byinshi byo kurwara kanseri kurusha umuntu unywa itabi cyane. Bagaragaza ko abanywa itabi bagenda bagabanuka mu gihe umubare w’abafite ibiro byinshi ukomeje kwiyongera bidasanzwe.

Umuyobozi w’iki kigo Michelle Mitchell yagize ati’’Kunywa itabi biragenda bigabanuka ariko umubyibuho ukabije ukomeje kwiyongera, bizangira ingaruka zikomeye ku buzima bw’igihugu niba guverinoma ntacyo ikoze’’

Yakomeje agira ati’’Abana bacu bashobora kureka kunywa itabi burundu ariko umubare w’abana bafite umubyibuho ukabije ukomeje kwiyongera. Tugomba kugira icyo dukora tugahagarika icyorezo. Haracyari amahirwe yo gutabara ubuzima’’

BBC dukesha iyi nkuru, itangaza ko umubyibuho ukabije utera kanseri ku bantu barenga 19,000 buri mwaka. Gusa iki kigo kivuga ko kitagamije kugereranya itabi n’umubyibuho ukabije cyangwa kubishyira mu gatebo kamwe , ahubwo ikigamijwe ni ukwerekana ingaruka zo kugira ibiro byinshi cyane birenze.

Aba bashakashatsi basaba abantu kwiyitaho bakita ku mirire yabo kugira ngo birinde ingaruka mbi ziterwa n’umubyibuho ukabije.

Nkurunziza Viateur @ Bwiza.com

Izindi wakunda

Bwiza.com