bwiza.com
Amakuru mashya

Yapfuye atageze ku nzozi zo kuba umunyafurika w’umwirabura wa mbere wari kugera ku kwezi

Mandla Maseko wo muri Afurika y’Epfo yari kuzaba ari we munyafurika wa mbere w’umwirabura ugeze ku kwezi ariko yakoze impanuka ya moto ahasiga ubuzima.

Iyi nkuru yababaje abanyafurika, Afurika y’Epfo n’umuryango we, ivuga ko yari yaratsindiye iyi tike ya Axe Apollo Space Academy mu 2013. Yabonye iyi tike n’abandi 22 bari baturutse mu bindi bihugu 74, aba umunyafurika rukumbi wayibonye. Abahatanaga bose bari bagera kuri miliyoni.

Maseko yamaze icyumweru ku kigo cya  Kennedy Space muri Florida, ubwo yari yaragiye kwitoza ibijyanye no kujya mu isanzure. Yahuye na Buzz Aldrin, uwa kabiri wakandagiye ku kwezi nyuma ya Neil Amstrong wagendeye mu cyogajuru cya Apollo 11 mu 1969.

Amakuru avuga ko yapfuye ku wa gatandatu, tariki ya 6 Nyakanga. Yari kugendera muri iki cyogajuru ariko ntibyakunda kuko ngo urugendo rwe batari baruteguye neza. Arinze apfa nta gahunda ihamye ijyanye n’itike yatsindiye.

Maseko wapfuye yari afite imyaka 30 y’amavuko, yigeze kuganira na The Guardian, ayibwira ko umuntu yagira inzozi zo kuba umupolisi cyangwa se umunyamategeko ariko ko bigoye kurota ibyo kuba umutwazi w’indege cyangwa ugendera mu isanzure.

Yabayeho umutwazi w’indege zigenga (private pilot), yari mu ngabo zirwanira mu kirere za Afurika y’Epfo, akanavanga umuziki cyangwa se DJ (Disc Joking).

Umunyafurika y’Epfo w’umuzungu, Mark Shuttleworth ni we wa mbere kuri uyu mugabane wagiye mu isanzure. Yaguze itike yo kugendera mu cyogajuru cy’Uburusiya cyitwa Soyuz mu 2002 ku mapawundi miliyoni 12. Aya asaga miliyari 13 z’amafaranga y’u Rwanda.

Yari kuzaba ishema ry’abirabura bo muri Afurika

 

Izindi wakunda

Bwiza.com
error: Alert: Ntabwo byemewe!!