bwiza.com
Amakuru Imyidagaduro Politiki

Chameleone na we yatangiye guhagarikirwa ibitaramo

Igipolisi cya Uganda cyahagaritse ibitaramo bya Joseph Mayanja uzwi nka Jose Chameleone mu muziki.  Abasesenguzi bavuga ko imbarutso ishobora kuba ari uko yinjiye mu ishyaka rya Bobi Wine utavuga rumwe n’ubutegetsi.

Chameleone uherutse gukorera igitaramo muri Masaka, yasabwe n’inzego z’umutekano gusubira kwaka uburenganzira ubuyobozi bukuru bwa polisi muri Kampala kugira ngo ibitaramo bye bizabe mu bifatwa nk’amananiza. Ni ibitaramo bitatu byari kuzabera muri Mutukula,  Kyotera na Bukomansimbi.

Chameleone n’abakunzi be bishyuye bari biteguye iki gitaramo cya Bukomansimbi ariko bakomwa mu nkokora n’igipolisi kubera ko atubahirije ibyo yasabwe. Itegeko ryo mu 2015 rivuga ko umuntu ushaka gukora igitaramo gikoranyije abantu barenze batatu, agomba kugisabira uburenganzira mbere y’iminsi 15 kugira ngo kibe.

Robert Nkuke, umwe mu baharanira inyungu za Chameleone mu muziki, yavuze ko basabye uburenganzira polisi y’aho bari gukorera ibitaramo kandi yarabyemeye,  bityo ngo atumva uburyo bari kujya no ku kicaro muri Kampala.

Chameleone yavuze ko aziyamamariza kuyobora umugi wa Kampala agasimbura Meya Erias Lukwago, agakurikira umujyo wa Bobi Wine ubu wicaye ku ntebe y’ubudepite. Uyu mudepite kandi yanatangaje ko aziyamamariza umwanya w’Umukuru w’Igihugu mu 2021.

Birashoboka ko kugira ngo abigereho yabonye ko ari ngombwa kwihuza n’ishyaka rya Bobi Wine, Democratic Party rivugwaho kugira abayoboke benshi b’urubyiruko.

Akimara kwihuza n’iri Shyaka,  Perezida Museveni bahuzaga umurongo yahise areka kumukurikira ku rubuga rwe rwa Twitter.

Nyuma,  Museveni yigeze kwihanangiriza uyu muhanzi,  amubwira ko politiki agomba kuyigendamo gake.

Ubuhanuzi bwatangiye buvuga ko Chameleone winjiye mu ishyaka ritavuga rumwe n’ubutegetsi bwa NRM atazahirwa na gato; mbese asibye inzira zose yagombaga kunyura kugira ngo akomeze atere imbere.

Urugero rwa hafi rwari urwa Bobi Wine cyangwa se Depite Robert Kyagulanyi wakubiswe akanafungwa kenshi. Yitwa ‘impirimbanyi y’uburenganzira bw’abaturage’.

Bobi Wine ni urugero rw’umuhanzi wahagarikiwe ibitaramo byinshi. Inzego z’umutekano zavugaga ko bitubahirije umutekano w’abaturage,  ubundi bikavugwa ko ari ibya politiki, aho kuba ibigamije gususurutsa abakunzi b’umuziki.

 

 

Izindi wakunda

Bwiza.com
error: Alert: Ntabwo byemewe!!