bwiza.com
Imikino

Uganda: Perezida Museveni yageneye abakinnyi b’ikipe y’igihugu miliyoni y’amadorari

 

Perezida wa Uganda Yoweri Kaguta Museveni yageneye abakinnyi b’ikipe y’igihugu ‘Uganda Cranes’ agahimbazamusyi gatubutse kagera kuri miliyoni y’amadorari nyuma y’uko iyi kipe yitwaye neza mu mikino y’igikombe cya Africa.

Perezida Museveni yatangaje ko yashimishijwe n’uko ikipe ya Uganda yitwaye mu mikino y’igikombe cya Africa.

Ikipe y’igihugu ya Uganda yari yitabiriye imikino y’igikombe cya Africa iri kubera mu Misiri kuva tariki ya 21 Kamena kugeza 19 Nyakanga 2019. Uganda yagerageje kwitwara neza muri iyi mikino aho yagarukiye muri 1/8 nyuma yo gutsindwa na Senegal igitego kimwe ku busa.

Museveni yatanze aya mafaranga mu gihe abakinnyi ba Uganda bari banze gukora imyitozo bari mu Misiri bavuga ko batahawe amafaranga y’agahimbazamusyi. Gusa byaje gukemuka abakinnyi bakomeza imyitozo.

Abinyujije ku rukuta rwe rwa Twitter perezida Museveni yagize ati’’ Nashimishijwe n’uko Uganda Cranes yageze muri 1/8. Nizeye ko ubutaha tuzitwara neza kurushaho . Ndategura miliyoni y’amadorari abakinnyi n’abayobozi bazagabana. Birimvikana ko abakinnyi bazafata menshi kurusha abayobozi’’

Ibibazo by’uduhimbazamusyi tw’abakinnyi bikunze kuvugwa cyane mu makipe y’ibihugu bya Africa ndetse bigakoma mu nkokora imyitwarire myiza y’amakipe atandukanye.

Museveni yongeyeho ko abakinnyi aribo bazagabana amafaranga menshi ugereranije n’abandi bayobozi b’ikipe.

Nkurunziza Viateur @Bwiza.com

Izindi wakunda

Bwiza.com