bwiza.com
Amakuru Politiki

Intambara y’ibitutsi hagati ya Perezida Trump n’abayobozi b’Ubwongereza

Umunyamabanga ushinzwe ububanyi n’amahanga w’Ubwongereza, Jeremy Hunt, yavuze ko Perezida Donald Trump wa Leta Zunze Ubumwe za Amerika “yasuzuguye” Minisitiri w’Intebe wabo n’igihugu cyabo.

Bwana Hunt avuze aya magambo nyuma yaho Perezida Trump avuze ko Sir Kim Darroch, uhagarariye Ubwongereza muri Amerika, ari ‘Umuntu w’igicucu cyane’.

Ni mu gihe hakomeje umwuka w’ubushyamirane hagati y’ibihugu byombi ushingiye ku butumwa bwa Emails’ bwari ibanga, Ambasaderi Sir Kim yandikiye abamukuriye mu Bwongereza bukaza guhishurirwa ikinyamakuru The Daily Mail.

Bwana Trump yanenze Minisitiri w’Intebe w’Ubwongereza, Theresa May, kuri gahunda y’Ubwongereza yo kuva mu muryango w’ubumwe bw’Uburayi.

Bwana Trump yanditse kuri Twitter ko Madamu May yirengagije inama yamugiriye, agahitamo gukurikiza “uburyo bwe bwite bwa gisazi”.

Ku cyumweru gishize, ubutumwa bwa Emails’ bwahishuye ko Ambasaderi Sir Kim yavuze ko ubutegetsi bwa Bwana Trump “bujagaraye kandi budashoboye”.

Bwana Hunt yasubije ku magambo ya Bwana Trump abinyuijie ku rubuga nkoranyambaga rwa Twitter. Agira ati “Inshuti zibwizanya ukuri, rero ni ko mbigenza: Aya magambo [ya Bwana Trump] asuzugura Minisitiri w’Intebe wacu n’igihugu cyanjye kandi ntarimo ukuri”.

Bwana Hunt uri mu bahatanira gusimbura Madamu May ku mwanya wa Minisitiri w’intebe, yavuze ko azagumisha Ambasaderi Sir Kim mu mwanya we kugeza kuri Noheli y’uyu mwaka ubwo azaba agiye mu kiruhuko cy’izabukuru.

Mu kiganiro mpaka cyo kuri televiziyo, Boris Johnson uri imbere mu bahatanira gusimbura Madamu May, yabajijwe niba aramutse atowe yagumisha Ambasaderi Sir Kim ku mwanya we, asubiza ko “atakwirengagiza kureba niba haba harabayeho kurengera”.

Bwana Johnson yavuze ko afitanye “umubano mwiza” n’ibiro na White House, kandi ko ari ingenzi kugirana “ubufatanye bwa hafi” na Amerika.

Ku wa kabiri tariki ya 9 Nyakanga 2019, Bwana Trump yatangaje ubutumwa kuri Twitter agira ati: “Ambasaderi uteye ishozi Ubwongereza bwatsindiriye Amerika ntabwo ari umuntu twishimiye, umuntu w’igicucu cyane”.

Mbere y’ubwo butumwa bwa Bwana Trump, ibiro bya Minisitiri w’intebe w’Ubwongereza byari byatangaje ko “bishyigikiye byimazeyo” Ambasaderi Sir Kim.

Byari byanatangaje kandi ko kujya ku karubanda kw’ubwo butumwa bw’ibanga “bibabaje”, ndetse ko Ubwongereza bwatangiye iperereza ku uko byagenze ngo ubwo butumwa buhishurwe.

Ibiro bya Minisitiri w’intebe w’Ubwongereza byongeyeho ko ibihugu byombi bifitanye “umubano mwiza bidasanzwe kandi urambye”

Izindi wakunda

Bwiza.com