bwiza.com
Featured Politiki

Mu mirwano nashoboraga kuhasiga ubuzima nk’uko abandi benshi bahazize ubwabo- Perezida Kagame

Perezida Kagame avuga ko ubwo yarwanaga urugamba rwo kubohora u Rwanda, atari afite intego yo kuzaba Perezida, mu gihe ngo yanashoboraga kuruburiramo ubuzima.

Yabitangaje mu kiganiro yagiranye n’abanyamakuru mu ntangiriro z’uku kwezi, mbere y’uko hizihizwa ibirori by’isabukuru y’imyaka 25 ishize u Rwanda rubohowe.

Iki kiganiro cyabereye mu Ngoro y’Inteko Nshingamategeko y’u Rwanda, hafatwa nk’igicumbi cy’amateka akomeye y’uru rugamba rwo kwibohora, aho mu 1994 harimo abagombaga gusaranganya ubutegetsi na Leta yari iyobowe na Leta ya Habyarimana Juvenal, nk’uko amasezerano ya Arusha yabiteganyaga, barinzwe n’ingabo za RPA.

Nyuma yo kubazwa  ku nzozi ze zo kuyobora u Rwanda, Perezida Kagame yasubije agira ati “Mu mirwano nashoboraga kuhasiga ubuzima nk’uko abandi benshi bahazize ubuzima bwabo, yewe sinigeze ndwana ngo nzabe Perezida.

Mu by’ukuri iyo biza kurwanira kuba Perezida ntabwo naribuzemo, intego yanjye narwaniye kugira igihugu ntari mfite, nkatanga umusanzu mfatanije n’abandi tukagera ku mpinduka zari zikenewe mu gihugu cyacu”.

Nk’uko Perezida Kagame abisobanura mu  gitabo cya Francois Soudan “Conversations with President of Rwanda” kivuga ku buzima bwe, avuga ko yari afite inzozi zo kuzatwara indege cyangwa akaba injeniyeri, gusa n’ubwo amateka yatumye inzozi ze atazigeraho ngo yishimira kuba uwo ari we.

Avuga ko yifuza kubona u Rwanda na Afurika muri rusange byibeshejeho bidategereje imfashanyo kandi abaturage bose babayeho neza. Kubwe Jenoside ni ibyago bikomeye u Rwanda rwagize.

Perezida Kagame ni umuyobozi ukunda ibintu bijyanye n’ubucuruzi n’ishoramari, iyo mpano ngo akaba ayikomora ku mubyeyi we wakoraga ubucuruzi bw’ikawa, wanagize uruhare mu guteza imbere ubuhinzi bw’ikawa mu Rwanda.

Izindi wakunda

Bwiza.com