bwiza.com
Ahabanza » Burundi: Umwana w’umukobwa w’imyaka 13 yamaze iminsi 4 asambanywa ku ngufu n’Imbonerakure
Amakuru Politiki

Burundi: Umwana w’umukobwa w’imyaka 13 yamaze iminsi 4 asambanywa ku ngufu n’Imbonerakure

Umwana w’umukobwa w’imyaka 13 yamaze iminsi ine asambanywa ku ngufu n’umuyobozi w’Imbonerakure none n’ababyeyi be bakomeje guterwa ubwoba mu gihe banabujijwe kujya kuvuza umwana wabo ngo bitazajya hanze. Uyu mwana atuye ahitwa Monge-Kiramata, muri Zone Ntega yo muri Komini Ntega, ho mu Ntara ya Kirundo.

Biravugwa ko uyu mwana w’umukobwa yasambanyijwe ku ngufu iminsi ine yose, guhera kuwa 01 Nyakanga kugeza kuwa 04 Nyakanga. Ni icyaha ngo cyakorerwaga mu nzu iherereye mu mudugudu wa Monge-Kiramata, muri Komini Ntega, mu Ntara ya Kirundo.

Uyu mwana ngo akaba yarafashwe ku ngufu n’Imbonerakure yo muri iki gice, nyuma yo kumara iminsi ine amusambanya ajya kumujugunya mu bihuru. Amakuru agera kuri RPA, dukesha iyi nkuru, akaba avuga ko uyu mwana yabonwe n’abahisi bahise bamujyana ku Kigo nderabuzima cya Ntega, aho yaherewe ubutabazi bw’ibanze.

Ayo makuru ariko akomeza avuga ko, bitewe n’ukuntu umwana yari amerewe nabi cyane, ababyeyi be bagiriwe inama yo kumujyana ku bitaro, ariko uyu muryango ukabuzwa gusohoka muri Zone Ntega kugirango ayo mahano atazajya ku karubanda.

Ikindi kandi, ngo uyu muryango watewe ubwoba ubuzwa gutanga ikirego. Mu rwego rwo kumenya ko bafunze umunwa, ayo makuru akomeza avuga kko umuyobozi w’Umudugudu wa Monge-Kiramata, Gerald Habimana, aherekejwe n’Imbonerakure z’aha hantu, babwiye ababyeyi b’umwana ko nibaramuka bagize icyo bavuga umuryango wose uzarimburwa.

Abaturage bo muri Ntega bakaba basaba ko icyaha nk’iki cyabaye nk’umuco cyahanwa bikomeye n’amategeko.

Izindi wakunda

Bwiza.com