bwiza.com
Ahabanza » Gen. Ntaganda akwiye igihano gisumba ibindi agakatirwa urwo gupfa- Umuturage w’i Goma
Amakuru Politiki

Gen. Ntaganda akwiye igihano gisumba ibindi agakatirwa urwo gupfa- Umuturage w’i Goma

Nyuma y’aho Gen. Bosco Ntaganda ahamijwe ibyaha byose 18 ashinjwa, abaturage bo mu mujyi wa Goma, muri Repubulika Iharanira Demokarasi ya Congo, barasaba ko n’abandi bari bafatanyije gukora ibi byaha ndetse n’abamuteraga inkunga bakurikiranwa, by’umwihariko we ko akwiye igihano gisumba ibindi.

Ku wa Mbere tariki ya 8 Nyakanga 2019, nibwo urukiko mpuzamahanga Mpanabyaha ICC, rwemeje ko Gen. Bosco Ntaganda ahamwa n’ibyaha 18 by’intambara n’iby’ibasiye inyokomuntu byakorewe muri Ituri, muri Repubulika iharanira Demokarasi ya Congo, hagati ya 2002 na 2003.

Abaturage bishimira iki cyemezo cy’urukiko by’umwihariko bakavuga ko ari intsinzi ku bagizweho ingaruka n’intambara n’abafashwe ku ngufu n’inyeshyamba Ntaganda yari ayoboye.

Uyu aragira ati “Yishe abantu, yabafataga nk’ibikoko, yishe abantu benshi cyane, iyo nkubwiye ko yishe abantu benshi akanasambanya abagore n’abakobwa muri Ituri, amateka ye arazwi neza, abaturage ba Masisi nabo babitangira ubuhamya, Ntaganda ni umuntu mubi gusumbya abandi batuye kuri iyi si. Umuntu wasambanije ba mama na bashiki bacu, akica barumuna be za Ituri na Masisi, ni amateka ya vuba, yarasaga n’abana”.

N’ubwo Ntaganda yahamijwe ibyaha ashinjwa byose 18, ariko ntabwo urukiko rwari rwamukatira, bityo abaturage bakaba basaba ko yahanishwa igihano gisumba ibindi byose bibaho ku Isi.

Uyu ati “Akwiye kwishyura, akwiye gufungwa burundu, njye ndi umunyafurika, tuvuga ko inkambi ikwiye kujya kure y’inziza, Ntaganda akwiye igihano gisumba ibindi agakatirwa urwo gupfa niba iki gihano kikibaho”.

Nk’uko VOA ibitangaza, aba baturage bifuza ko byaba urugero no ku bandi bayoboye inyeshyamba ubu zikomeje kujujubya abaturage mu bice bitandukanye bya Repubulika Iharanira Demokarasi ya Congo.

Kubera ibyaha Ntaganda yashinjwe, yaje guhimbwa akazina ka ‘The Terminator’ iri zina rizwi muri filimi ya Arnold Schwarzenegger, igaragaramo ubwicanyi bukomeye, ubwaryo urigenekereje  nk’uko risobanurwa n’umusomyi wa Bwiza.com, wanarwanye imwe mu ntambaza zabereye muri Congo.

Asobanura iri jambo Terminator agira ati “Iri jambo Terminator ubwaryo ushobora kurigenekereza uhereye kuri etmologie yaryo y’igifaransa “Terminer” rero iyi ikaba yaba inyito y’umuntu urangiza, Ruhorahoza, uhorahoza, usoza cyangwa se umuntu ufata umwanzuro wa nyuma,…uyu mugabo yari dangerous”.

Bosco Ntaganda yahamijwe ibyaha byose bigera kuri 18 by’intambara n’iby’ibasiye inyokomuntu yari akurikiranweho birimo ubwicanyi, gufata ku ngufu, kugira abantu abacakara b’imibonano mpuzabitsina, kugaba ibitero ku basivili, gutuma bava mu byabo, kwinjiza abana mu gisirikare, gusenya no kwangiza n’ibindi.

Bosco Ntaganda afite iminsi 30 yo kujurira, akaba agomba kuguma afunze kugeza urukiko rutangarije igihano yahawe. Afite iminsi 30 yo kujurira, akaba agomba kuguma muri gereza kugeza urukiko rutangarije igihano yahawe.

Izindi wakunda

Bwiza.com