bwiza.com
Amakuru Politiki

Ku nshuro ya mbere Igisirikare cy’u Rwanda cyakoresheje akarasisi ko mu Bushinwa ku Munsi wo kwibohora

Igisirikare cy’u Bushinwa nicyo cyatoje Igisirikare cy’u Rwanda akarasisi k’akataraboneka gaherutse gukorwa ku Munsi wo Kwibohora ku nshuro ya 25, ku itariki 04 Nyakanga, aho muri aka karasisi hakoreshejwe n’Igishinwa mu guha abari mu karasisi amabwiriza mu gihe hari hamenyerewe akarasisi gafite inkomoko mu burengerazuba bw’Isi.

Abakuru b’ibihugu byo muri Afurika birindwi bari mu bakurikiranye aka karasisi ko ku Munsi wo Kwibohora ku nshuro ya 25 mu Rwanda, kabereye kuri Stade Amahoro, mu Mujyi wa Kigali kuwa 04 Nyakanga 2019.

Televiziyo y’u Bushinwa, CCTV, ivuga ko ari ku nshuro ya mbere akarasisi nk’aka ka Gishinwa kari kabereye mu Rwanda, aho kuba agasanzwe gakomoka ku gisirikare cyo mu burengerazuba.

Bivugwa ko ubwo abasirikare bakoraga akarasisi,bateraga amasaluti ndetse bagatanga amabwiriza mu Gishinwa nk’aho umuyobozi yagiraga ati: “Reba I Buryo”! Abasirikare nabo bakamusubiza mu Gishinwa bagira bati “ Rimwe! Kabiri!”. Aha mwari mumenyereye “Kuria Geuka” na “Moja! Mbiri!”

Muri Mata nibwo igisirikare cy’u Rwanda cyasabye icy’Ubushinwa kohereza abatoza ba gisirikare ngo bafashe mu gutoza abasirikare n’abapolisi bakoze ako karasisi ko ku “munsi wo kwibohora”, nkuko bitangazwa n’iki kinyamakuru The South China Morning Post.

Abarimu ba gisirikare batandatu b’u Bushinwa batoje abasirikare n’abapolisi bagera hafi ku 2000 bari bagize amasibo 22 yakoze ako karasisi.

Liu Baoxin, umwarimu wo mu gisirikare cy’u Bushinwa, yabwiye televiziyo CCTV ko abo basirikare n’abapolisi b’u Rwanda bagiye batozwa amasaha arenga umunani buri munsi, hagendewe ku migenzo y’akarasisi ka gisirikare k’u Bushinwa.

Yagize ati: “Akarasisi k’uyu munsi [ku wa kane ushize] karenze ibyo twari twiteze, ndetse kageze ku ho tuba twifuza nk’urugero fatizo rw’imyitozo yacu. Twishimiye cyane uko bitwaye”.

Mu myaka ya vuba ishize, u Bushinwa bwongereye gukorana n’ibihugu by’Afurika mu ishoramari mu bucuruzi ndetse n’ibya gisirikare birimo nko kugurisha intwaro.

U Rwanda kandi rwakunze kugura ibikoresho bya gisirikare mu Bushinwa, birimo missiles zo kurinda ibitero byo mu kirere ndetse n’izishwanyaguza ibimodoka by’intambara.

Mu Ukuboza umwaka ushize akaba ari bwo Igisirikare cy’u Rwanda cyagaragaje bwa mbere ibyo bikoresho bya gisirikare rwaguze mu Bushinwa birimo PCL-09 Self Propelled Howitzer.

 

 

Izindi wakunda

Bwiza.com
error: Alert: Ntabwo byemewe!!