bwiza.com
Ahabanza » U Rwanda ruhagaze rute mu rugamba rwo guhangana n’ibyorezo?
Amakuru Politiki

U Rwanda ruhagaze rute mu rugamba rwo guhangana n’ibyorezo?

Minisiteri y’ubuzima mu Rwanda ivuga ko yiteguye gukumira indwara z’ibyorezo igihe cyose, haba ku miti, ku baganga ndetse no mu bundi buryo bwose nubwo ngo abantu badakwiye kwirara.

Ibi byatangajwe kuri uyu wa Gatatu Tariki ya 10 Nyakanga 2019, ubwo mu Rwanda hatangizwaga inama igamije kurebera hamwe uko ibihugu byakwitegura mu gihe hateye ibyorezo.

Mu kiganiro yahaye itangazamakuru, Minisitiri w’Ubuzima Dr. Diane Gashumba iyi nama igamije kuganira n’ibindi bihugu ngo abaturage bagerweho n’imiti ihagije kandi ibabere ho ku gihe.

Ati “Ni inama igamije kuganira n’ibindi bihugu mu kureba uburyo twarushaho kwitegura cyane cyane muri Afurika, kwitegura kugira imiti ihagije n’inkingo uko bigera ku baturage.

Turimo kuvuga ibyorezo byagiye biba muri Afurika y’Iburengerazuba, igihe habaga icyorezo cya Ebola, turavuga ku cyorezo cya Ebola kiri mu bihugu by’abaturanyi n’uko imiti ituruka aho igurirwa ariko ikagenda kugeza igihe igereye ku muturage n’imbaraga zigendamo kugira ngo bitungane, tukavuga ku ikoranabuhanga ariko nanone tukabasangiza ibikorwa mu gihugu cyacu.”

Minisitiri w’Ubuzima Dr. Diane Gashumba yavuze ko ibihugu by’Afurika byahanahannye ubunararibonye bifite mu guhangana n’ibyorezo, u Rwanda rwumva intege nke rufite kandi ko bikwiye gukosorwa.

Yagize ati “ibyagagajwe cyane cyane ni ibibazo ku bihugu bidafite ubwisungane mu kwivuza, abadafite abaturage batanga ku mikoro yabo bagitekereza ko igihugu kigomba gukora byose cyangwa abafatanyabikorwa, ariko na none tukagaragaza aho dufite imbogamizi. Ntabwo twavuga ngo ibyacu biratunganye neza kuko uyu munsi ntabwo twavuga ngo imiti yose dushaka mu gihugu  turayifite, cyane cyane ko imiti myinshi tuyikura hanze, turacyarwana urugamba rwo kugira ngo tugire imiti ifite ubuziranenge kandi tuyibonere ku gihe, kandi igere kuri buri wese. Ni ugusangira rero kugira ngo tuganire ku byiza dufite, ariko na none tugaruke no ku mbogamizi dufite.”

Nk’uko RadioTv Flash ibitangaza, ngo abateraniye muri iyo nama kandi bazasura ikibuga k’indege nto zitwara zitagira abapilote, drones, zifite ikicaro gikuru i Muhanga, barebe uko zifasha mu kugeza amaraso ku bitaro biri kure agiye gutabara indembe.

Inzobere mu by’ubuvuzi n’abashyiraho ingamba muri politiki z’ubuvuzi n’abafatanyabikorwa babo basaga 250 baturutse mu bihugu birenga 70 ku Isi, nibo bateraniye i Kigali muri iyi nama y’iminsi ibiri isozwa kuri uyu wa kane.

Izindi wakunda

Bwiza.com