bwiza.com
Amakuru Politiki

Abantu 212 bamaze kwicwa mu Burundi kuva umwaka wa 2019 watangira- HRW

Umuryango uharanira uburenganzira bw’ikiremwamuntu ku Isi, HRW, utangaza ko kuva muri Mutarama kugera muri Kamena 2019, abantu 212 bagiye bicwa mu buryo butandukanye, mu gihugu cy’u Burundi.

Raporo y’uyu muryango yashyizwe ahabona ku wa Kabiri tariki ya 9 Nyakanga 2019, igaragaza ko abantu 212 aribo bishwe, ariko abo imirambo yabo yabonetse ni 104.

Uyu muryango kandi ugaragaza ko abantu 29 baburiwe irengero mu Burundi, 164 bakorerwa iyicarubozo, mu gihe 468 bagiye batabwa muri yombi mu buryo bunyuranyije n’amategeko, 32 bafatwa ku ngufu.

SOS Medias/Burundi, itangaza ko mu bantu 212 ngo harimo 156 bishwe n’abantu bataramenyekana. Muri 34 bafashwe ku ngufu, 16 muri bo ni abana batarageza ku myaka 18 y’ubukure, bakaba baranishwe.

Iyi raporo igaragaza ko politiki yimakaza umuco wo kudahana cyane cyane abarwanashyaka b’ ishyaka riri ku butegetsi, ndetse no gufunga bimwe mu bitangazamakuru mpuzamahanga nka BBC na VOA, ngo biri mu bitiza umurindi ihohoterwa ry’ikiremwamuntu muri iki gihugu.

Ni kenshi byagiye bitangazwa mu binyamakuru bitandukanye ko urubyiruko rw’Imbonerakure, rubarizwa mu ishyaka CNDD-FDD riri ku butegetsi, arirwo ruza ku isonga mu bikorwa by’ubwicanyi bikorerwa abatavuga rumwe na Leta, gufata abagore n’abakobwa ku ngufu n’ibindi byaha.

Ibi byaha bishinjwa Imbonerakure ndetse n’ibindi bishinjwa Leta y’u Burundi, bishingiye ku ihutazwa ry’uburenganzira bw’ikiremwamuntu, Leta y’u Burundi yagiye ibihakana yivuye inyuma ahubwo igasaba impunzi zahunze igihugu gutaha, izizeza ko amahoro n’umutekano mu gihugu bihari.

 

Izindi wakunda

Bwiza.com
error: Alert: Ntabwo byemewe!!