bwiza.com
Ahabanza » Burundi: Banki yigenga irashinjwa gutera inkunga abitwaje ibirwanisho
Amakuru Politiki

Burundi: Banki yigenga irashinjwa gutera inkunga abitwaje ibirwanisho

Banki yigenga mu gihugu cy’u Burundi izwi nka InterBank Burundi kuri uyu wa Gatatu ushize, itariki 10 Nyakanga, yashinjijwe n’Urukiko rwo mu Mujyi wa Bujumbura gukorana n’imitwe yitwaje intwaro ikorera mu burasirazuba bwa Congo.

Ubutabera bw’u Burundi bwafunguye dosiye kuri InterBank Burundi nyuma y’aho amafaranga abarirwa muri miliyoni n’igice y’Amadolari yari agiye kwibirwa mu Gatumba, ku mupaka w’u Burundi na Repubulika iharanira Demokarasi ya Congo mu cyumweru gishize.

Ubutabera bw’u Burundi bukaba bunashinja InterBank Burundi kurenga ku mabwiriza abuza gusohora mu gihugu amafaranga arenze 3000 by’Amadolari (Hafi miliyoni 10 z’Amarundi).

Mu kwiregura nk’uko iyi nkuru dukesha UBMNews ikomeza ivuga, InterBank Burundi yavuze ko iyo miliyoni 1,5 y’Amadolari yari igiye kwibwa yari ijyanywe mu yindi banki yo muri Congo ikorana na InterBank Burundi yitwa Trust Merchant Bank iherereye Uvira, nko mu birometero 10 uvuye mu Mujyi wa Bujumbura.

Ubutabera bw’u Burundi bukavuga ko amafaranga yose InterBank Burundi yajyanye muri Congo kuva mu 2015, yari ayo gufasha imitwe yitwaje ibirwanisho ikorera ku butaka bwa Congo, harimo n’ishaka guhirika ubutegetsi bw’u Burundi.

Ubutabera bw’u Burundi bukaba bwahise busaba ko ayo mafaranga yari agiye kwibwa afatwa agashyirwa mu kigega cya leta.

InterBank Burundi kandi yaciwe amande agera kuri miliyari 44 z’Amarundi n’impozamarira kuri Leta y’u Burundi igera kuri miliyari 50 z’Amarundi.

Iyi banki ariko yo irahakana ibyo ishinjwa byose ivuga ko ahubwo ibikorwa byayo byatumaga u Burundi bubona amafaranga y’amadevize mu gihe hakomeje kugaragara ikibazo cy’aya mafaranga muri iyi minsi mu Burundi.

Biravugwa ko InterBank iyoborwa n’abanyamahanga barimo Ababiligi n’Abafaransa n’abandi banyamahanga nk’uko bigaragara ku rubuga rwayo.

Izindi wakunda

Bwiza.com
error: Alert: Ntabwo byemewe!!