bwiza.com
Ahabanza » Perezida Kagame yageze muri Angola aho agiye guhurira na Museveni, Tshisekedi & João
Amakuru Politiki

Perezida Kagame yageze muri Angola aho agiye guhurira na Museveni, Tshisekedi & João

Perezida wa Repubulika, Paul Kagame yageze i Luanda, Umurwa Mukuru wa Angola, kuri uyu wa Gatanu tariki ya 12 Nyakanga 2019, aho agiye guhurira n’abakuru b’ibihugu bya Uganda, Repubulika Iharanira Demokarasi ya Congo na Angola.

Nk’uko Perezidansi y’u Rwanda yabitangaje ibicishije ku rukuta rwayo rwa Twitter, ngo Perezida Kagame w’u Rwanda, Museveni wa Uganda, Tshisekedi wa RDC ndetse na João Lourenço wa Angola, bagiye guhurira mu nama yiga ku bufatanye n’umutekano mu Karere ibi bihugu biherereyemo.

Ibicishije kuri Twitter, Minisiteri y’Ububanyi n’Amahanga ya Angola, yatangaje ko iyi nama yatumijwe na Perezida wa Angola.

Mu mpera z’ukwezi kwa Gatanu, Perezida Félix  Tshisekedi wa Repubulika Iharanira Demokarasi ya Congo (RDC), yakiriye mugenzi we w’u Rwanda, Paul Kagame na João Lourenço wa Angola, mu nama y’inyabutatu yari igamije kwiga ku kugarura umutekano mu karere no kongera ubufatanye mu bukungu.

Aba bakuru b’ibihugu bari bitabiriye n’umuhango w’ishyingurwa rya Etienne Tshisekedi ubyara Perezida Felix Tshisekedi, ngo banashyize umukono ku masezerano agamije ubufatanye mu kurwanya imitwe y’inyeshyamba yitwaje intwaro zihungabanya umutekano mu karere.

Mu kiganiro Perezida Kagame yagiranye n’itangazamakuru mu ntangiriro z’uku kwezi, yavuze ko u Rwanda rwiteguye gutiza amaboko RDC mu rugamba rwo kurandura burundu imitwe y’inyeshyamba, agashima ko Perezida w’iki gihugu, Tshisekedi yemera ubu bufasha.

Yagize ati “Ibyo Perezida wa Congo yavuze nibyo, tuzabafasha twari twarabitegereje kandi ndishimye cyane kuba dufite umuntu hariya uvuga ko ashaka gukorana n’abaturanyi mu gukemura kiriya kibazo,…”.

Muri iyi nama kandi Perezida Kagame agiye guhuriramo na Museveni, benshi bategereje kumenya icyo izageraho mu gihe umubano w’u Rwanda na Uganda umaze imyaka ibiri utifashe neza.

U Rwanda rushinja Leta ya Uganda guhohotera mu buryo butandukanye Abanyarwanda bagirirayo ingendo, mu gihe ngo bamwe baba bashinjwa kurunekera, Uganda nayo ikarushinja ibirimo no gufunga umupaka no kubangamira ubucuruzi hagati yabyo. Ibirego impande zombi zihakana.

 

Izindi wakunda

Bwiza.com
error: Alert: Ntabwo byemewe!!