bwiza.com
Ahabanza » Sudani: Haburijwemo umugambi wo guhirika ubutegetsi
Amakuru Politiki

Sudani: Haburijwemo umugambi wo guhirika ubutegetsi

Abahagarariye akanama ka gisirikare kayoboye igihugu cya Sudani kuri uyu wa kane bemeje ko haburijwemo umugambi wo guhirika ubutegetsi mu gihe amasezerano bagiranye n’abayoboye imyigaragambyo ku nzibacyuho yendaga gushyirwaho umukono mu minsi iri imbere.

“Ba ofisiye n’abasirikare n’abagize inzego z’igihugu z’ubutesi, barimo abasezerewe, bagerageje guhirika ubutegetsi,” ibi ni ibyatangajwe kuri uyu wa Kane ninjoro na Gen. Jamal Omar mu butumwa bwanyujijwe kuri Televiziyo y’Igihugu.

Yakomeje avuga ko igisirikare cyabashije kuburizamo uwo mugambi, yongeraho ko ba ofisiye 12 n’abasirikare bane bo hasi batawe muri yombi, ariko ntiyasobanura neza igihe uko kugerageza guhirika ubutegetsi kwabereye. Yashimangiye ko iperereza ryatangiye ngo hamenyekane abari inyuma y’iki gikorwa.

Ibi byatangajwe mu gihe ibiganiro byari birimbanyije hagati y’abasirikare n’abasivili I Khartoum hagamijwe kunoza ibikubiye mu masezerano ku inzibacyuho nk’uko iyi nkuru dukesha Jeune Afrique ikomeza ivuga.

Gen. Jamal Omar akaba yatangaje ko uku kugerageza guhirika ubutegetsi kwari kugamije kuburizamo ayo masezerano yitezweho gufungura inzira igana ku kugera ku byifuzo by’abaturage ba Sudani.

Kuwa 05 Nyakanga nibwo impande zombi zatangaje ko habonetse amasezerano ku rwego ruzaba rushinzwe kuyobora inzibacyuho mu gihe cy’amezi atatu.

Aya masezerano ateganya ko abasirikare bazayobora uru rwego mu gihe cy’amezi 21 ya mbere, naho abaturage bakazabasimbura bakayobora inzibacyuho amezi 18 asigaye. Nyuma y’aha igihugu kikazajya mu matora.

 

Izindi wakunda

Bwiza.com