bwiza.com
Ahabanza » Tanzania: Ubwoba bwatashye impunzi z’Abarundi zabwiwe ko zigiye gucyurwa ku ngufu
Amakuru Politiki

Tanzania: Ubwoba bwatashye impunzi z’Abarundi zabwiwe ko zigiye gucyurwa ku ngufu

Impunzi z’abarundi ziri muri Tanzaniya zivuga ko zifite ubwoba nyuma yo kubwirwa ko hari umugambi wo kuzihungura ku nguvu, kandi zitizeye umutekano mu gihe zasubizwa mu Burundi.

Bamwe mu mpunzi zo mu nkambi ya Nyarugusu iri mu Ntara ya Kigoma bavuga ko bakoreshejwe inama n’umukuru w’inkambi ku wa 04 z’uku kwezi kwa karindwi akababwira ko nta kamaro ko kuguma mu buhungiro kuko mu Burundi ari amahoro.

HCR ivuga ko Tanzania icumbikiye impunzi zirenga 200 000 z’Abarundi. Aba bagizwe ahanini n’abahunze imvururu zishingiye kuri politiki zo mu 2015 ubwo hategurwaga amatora mu Burundi.

Mu majwi yafatiwe muri iyi nama mu nkambi ya Nyarugusu, umuyobozi w’iyi nkambi, Jumanne Singani, yumvikana avuga ko izi mpunzi zatumye umutekano w’abaturage ba Tanzaniya uhungabana, ku buryo batinya no gufata ingendo.

Yibutsa izi mpunzi ko hariho ibisubizo bitatu ku kibazo cy’impunzi: Guhunguka ku bushake bwabo, guhabwa ubwenegihugu cyangwa se gushaka ubuhungiro mu kindi gihugu.

Muri buno buryo butatu, Bwana Singani yababwiye ko igisubizo ku mpunzi z’Abarundi ziri muri Tanzaniya, ubu ari uko zisabwa guhunguka.

Yagize ati: “Turebye uburyo ibintu bimeze ubu, ikiriho ni uko muhunguka kuko mu Burundi amahoro arasesuye”.

BBC itangaza ko yabwiye impunzi kandi ko hari n’uburyo butatu bwo guhunguka. Ati:”Ubwa mbere ni guhunguka ku bushake bwanyu, ubwa kabiri guhunguka mubishishikarijwe, ubwa gatatu ni uguhunguka hakoreshejwe ingufu”.

Bwana Singani yumvikana abwira izi mpunzi z’Abarundi ko byaba byiza bahungutse ku bushake bwabo, batarindiriye ko hakoreshwa ingufu.

Mu 2012, impunzi z’Abarundi zari mu nkambi ya Mtabila iri muri District ya Kasulu, Intara ya Kigoma, zacyuwe ku ngufu. Uyu muyobozi w’inkambi yabwiye impunzi ko ingingo yo kubahungura yafashwe nyuma y’inama yahuje abategetsi ba Tanzaniya, b’u Burundi n’ishyirahamwe HCR rishinzwe impunzi.

Umwe mu mpunzi utashatse gutangazwa, avuga ko batewe ubwoba n’ibyo barimo gusabwa byo gutaha, ati”Gufatira ku byabaye mu 2012 ku mpunzi zari mu nkambi ya Mtabila, no ku mpunzi z’Abanyarwanda muri Kagera (1996). Iyo badukoranije mu manama, nta bindi batwibutsa atari ibyo”. Asaba amahanga ko amategeko agenga impunzi yakurikizwa bakarindirwa umutekano.

Izindi wakunda

1 Igitekerezo

Agatima k’impunzi z’Abarundi ziri muri Tanzania kasubiye mu gitereko – bwiza.com 24/07/2019 7:40 am at 7:40 am

[…] Yakomeje avuga ko bamaze igihe bahanganye n’ikibazo cy’umutekano muke uvugwa mu nkambi z’impunzi z’Abarundi, kuba bivugwa ko zigabwaho ibitero n’abaturutse i Burundi, avuga ko ayo makuru atayahamya, bityo ko Leta ya Tanzania ifite mu nshingano kurindira izi mpunzi umutekano ku buryo bwose bushoboka. Kanda hano usome inkuru bifitanye isano […]

Subiza

Tanga Igitekerezo

Bwiza.com