bwiza.com
Ahabanza » Turkiya yatangiye kwakira ubwirinzi bwo mu kirere, S-400, yaguze mu Burusiya Amerika itabishaka
Amakuru Politiki

Turkiya yatangiye kwakira ubwirinzi bwo mu kirere, S-400, yaguze mu Burusiya Amerika itabishaka

Kuri uyu wa Gatanu, itariki 12 Nyakanga, I Ankara muri Turkiya hagejejwe uburyo bw’ubwirinzi bw’ibitero byo mu kirere buzwi nka S-400 iki gihugu cyaguze mu Burusiya Leta Zunze Ubumwe za Amerika zitabikozwa. S-400 bufatwa na bamwe mu mpuguke nk’ubwirinzi bwa za missiles buteye imbere kurusha ubundi ku Isi.

Ubu buryo bw’ubwirinzi bw’ibitero bwo mu kirere ni ikamyo y’umutamenwa iba iteretseho ibintu bine bimeze nk’impombo birasa missiles zishwanyuza izindi. S-400 yatangiye gukorwa n’u Burusiya mu myaka ya za 90. Abahanga bavuga ko nta ntwaro wayigereranya nayo.

S-400 ifite ubushobozi bwo gutabara mu gihe kitarenze amasegonda 10 ikikanga igitero cy’umwanzi, igashakisha igisasu cyangwa indege bikiri mu birometero magana ikabyangiza. Iyi nkuru dukesha RFI iravuga ko kuva yatangira gukoreshwa n’Igisirikare cy’u Burusiya mu 2007, S-400 imaze kwifuzwa n’ibihugu byinshi ku Isi. Ibihugu nk’u Bushinwa n’u Buhinde byo byamaze kuzibikaho.

Kuba ariko u Burusiya bwaragurishije izi ntwaro ku gihugu kibarizwa mu Muryango wa OTAN, byarakaje bikomeye Leta Zunze Ubumwe za Amerika ndetse zikangisha Turkiya gufatirwa ibihano no kutazayigurisha indege z’intambara zazo zizwi nka F-35 zagombaga kwifashishwa n’Igisirikare kirwanira mu kirere.

Izi ndege zo mu bwoko bwa F-35 nubwo zikorerwa muri Amerika ariko hari ibindi bihugu byashoye amafaranga mu kuzikora nka Turkiya bivugwa ko yashoye miliyari isaga y’Amadolari muri iyi gahunda ndetse ikaba iteganya kugura izi ndege zigera mu 100 mu rwego rwo gukomeza kubaka igisirikare cyo mu kirere.

Leta zunze Ubumwe za Amerika ariko zabwije ukuri Turkiya ziyibwira ko igomba guhitamo S-400 cyangwa F-35. Amerika ikaba yemera ko S-400 zishobora kubangamira umutekano wa F-35 kandi ngo si ukwibeshya nk’uko byemezwa n’impuguke yo muri Turkiya, Sinan Ülgen .

 

 

 

Izindi wakunda

Bwiza.com
error: Alert: Ntabwo byemewe!!