bwiza.com
Imikino

CECAFA 2019: Rayon Sports yatsinzwe na KMC ariko ikomeza muri ¼

 

Ikipe ya Rayon Sport ntabwo yabashije kwikura imbere y’ikipe ya KMC yo muri Tanzania aho yatsinzwe igitego kimwe ku busa mu mukino wa gatatu wo mu itsinda rya mbere mu mikino ya CECAFA Kagame Cup 2019.

Wari umukino wa gatatu wo mu itsinda rya mbere ndetse ari n’umukino wa nyuma mu matsinda ,aho wabereye kuri stade ya Kigali I Nyamirambo. Uyu mukino wakinwe Rayon Sports yaramaze kubona itike ya ¼ cy’irangiza.

Ni umukino utahiriye Rayon Sports kuko yaje gutsindwa igitego kimwe ku busa ku munota wa 38 imbere y’abakunzi bayo. Iki gitego cya KMC cyatsinzwe na Hassan Kabunda ku burangare bwa ba myugariro ba Gikundiro.

Gusa nubwo KMC yatsinze Rayon Sports, ibi ntacyo byayimariye kuko Gikundiro niyo yaje gukomeza mu cyiciro gikurikira mu gihe KMC yahise isezererwa itarenze umutaru. Iyi kipe ikomoka muri Tanzaniya yagerageje gukina neza dore ko yarushaga Rayon Sport mu buryo bugaragara.

Umukino watangiye KMC isatira cyane bituma ku munota wa 38 ibona igitego ndetse n’igice cya mbere kirangira KMC ariyo iyoboye umukino. Igice cya kabiri Rayon yagerageje kwishyura ariko birananirana umukino urangira itsinzwe.

Nyuma yo gutsindwa , Rayon sport yarangije ku mwanya wa kabiri n’amanota atandatu mu gihe TP Mazembe ariyo iyoboye itsinda rya mbere n’amanota atandatu ariko izigamye ibitego byinshi kurusha Rayon.

Biteganijwe ko imikino ya ¼ izatangira kuwa kabiri aho Rayon Sports izahura na KCCA yo muri Uganda, mu gihe TP Mazembe izahura na Azam FC yo muri Tanzaniya.

Nkurunziza Viateur @Bwiza .com

Izindi wakunda

Bwiza.com
error: Alert: Ntabwo byemewe!!