bwiza.com
Amakuru Imikino

AFCON 2019: Uburemere bw’umukino wa ½ uza guhuza Nigeria na Algeria

775137949HA00040_Croatia_v_

Ikipe y’igihugu y’umupira w’amaguru ya Nigeria, “Super  Eagles”, kuri iki Cyumweru mu mukino uyihuza n’ikipe ya Algeria iraba ikinira ku ntego z’amadolari byibuze 75,000 nibaramuka batsinze.

Ni umukino uhuza ikipe y’umupira w’amaguru ya Nigeria n’iya Algeria muri kimwe cya kabiri cy’Imikino ya nyuma y’Igikombe cya Afurika cy’Ibihugu , AFCON 2019, ubera Cairo kuri iki Cyumweru.

Umuherwe wa Mbere muri Afurika, Aliko Dangote, yemeye kwishyura buri mukinnyi utsinda igitego ibihumbi 50,000 by’Amadolari.

Nk’uko byemejwe na Bwana Amaju Pinnick, Perezida w’Ishyirahamwe ry’Umupira w’Amaguru muri Nigeria, NFF, undi muherwe wo muri Nigeria ukora ubucuruzi bwa peteroli, Femi Otedola, yemeye guhemba ikipe Amadolari 25,000 kuri buri gitego batsinze.

Ibiro Ntaramakuru by’Abafaransa, AFP, biravuga ko hari n’abandi baherwe benshi muri Nigeria, bagiye bahemba abakinnyi ba Nigeria akayabo k’amafaranga nyuma yo kuba bamwe mu makipe ane asigaye mu irushanwa.

Abayobozi bakaba bemeza ko kugeza ubu buri mukinnyi amaze kwakira nk’Amadolari 75,000 y’agahimbazamusyi n’impano.

Hagati aho, ku rundi ruhande Algeria nayo yakaniye. Icyizere cyo kugera ku mukino wa nyuma ku ikipe y’Igihugu y’Umupira w’Amaguru ya Algeria, “Les Fennecs”  kirongerwa n’abafana 2,000 boherejwe gufasha abari basanzwe gushyigikira ikipe mu mukino wo kuri iki Cyumweru, itariki 14 Nyakanga 2019.

Biravugwa ko indege esheshatu (6) za gisirikare, kongeraho izindi 10 za kompanyi y’igihugu yo gutwara abantu mu ndege, Air Algeria, ziri bukore ingendo zidasanzwe zo gufasha Les Fennecs kubona itsinzi, mu gihe igerageza kongera gukoza intoki ku Gikombe cya Afurika bwa mbere nyuma y’imyaka 29.

AFP iravuga ko Minisitiri w’ingabo wa Algeria avuga ko ubuyobozi bukuru bw’ingabo bwafashe iki cyemezo, ku bufatanye na Minisitiri w’Intebe, Noureddine Bedoui, cyo kohereza izindi ndege za gisirikare 6 kugirango Abanyalijeriya bandi 600 basange bagenzi babo bashyigikire ikipe y’igihugu itsinde uyu mukino w’ingenzi.

Umuvugizi wa Air Algeria akaba yavuze ko nabo bari bujyane abafana 1400 mu ndege 10.

Biteganyijwe ko kuri iki Cyumweru, Ikipe ya Nigeria iza guhura na Algeria ku isaha ya saa 21:00 z’ijoro, mu gihe Senegal iza kwisobanura na Tunisia saa 18:00 z’umugoroba. Izikomeza zizakina ku mukino wa nyuma kuwa Gatanu, itariki 19 Nyakanga 2019.

 

 

Izindi wakunda

Bwiza.com
error: Alert: Ntabwo byemewe!!