bwiza.com
Ahabanza » Minisiteri y’ubuzima iraburira abakoresha umupaka wa Rubavu kutajya I Goma mu gihe hakivugwa Ebola
Ubuzima

Minisiteri y’ubuzima iraburira abakoresha umupaka wa Rubavu kutajya I Goma mu gihe hakivugwa Ebola

 

Minisitiri w’ubuzima Dr Diane Gashumba araburira abanyarwanda bakoresha umupaka wa Rubavu kwirinda kujya I Goma mu gihe hakivugwa Ebola ndetse n’abagiyeyo bakitwararika.

Ibi minisitiri Gashumba yabisabye abanyarwanda kuri uyu wa mbere tariki ya 15 Nyakanga 2019 ,ubwo yaganiraga n’abanyamakuru ku mupaka uhuza u Rwanda na Congo uherereye mu Burengerazuba bw’u Rwanda mu karere ka Rubavu.

Ibi bije kandi Nyuma y’uko ku cyumweru tariki ya 14 Nyakanga 2019, icyorezo cya Ebola kigaragaye mu mugi wa Goma. Umujyi wa Goma uhana imbibi n’uwa Gisenyi mu burengerazuba bw’igihugu. Abatuye iyi migi baragenderanira cyane buri munsi ahanini bishingiye ku bucuruzi.

Ibikorwa byo gupima abanyura kuri uyu mupaka bikaba byongewemo imbaraga . Abaturage barambuka ari benshi ariko bafite ubwoba kubera Ebola ivugwa muri Goma.

Minisitiri Gshumba akaba yagiye kuri uyu mupaka kureba uko ibikorwa byo gusuzuma iyi ndwara biri kugenda.

Minisitiri Gashumba yabwiye abanyamakuru ko abaturage bagomba gukoresha umutimanama wabo mbere yo kwambuka.

Yagize ati’’Ntabwo twavuga ko dufunze umupaka ariko buri wese agomba kuganira n’umutimanama we akumva ko ubusugire bw’igihugu bumureba, niba ibyo yahahiraga hariya yashobora kubibona hano ,yareka kujyayo kugeza iki cyorezo kirangiye’’

Yakomeje agira ati’’Ntabwo twavuga ngo dufunze imipaka ariko ntitwabura kubwira umuntu ngo niba hariyo icyorezo , wijyayo’’Avuga ko u Rwanda rwafashe ingamba zikomeye zo kwirinda Ebola.

BBC dukesha iyi nkuru, ivuga ko mu Rwanda hashyizweho itsinda rya minisiteri y’ubuzima n’ikigo gishinzwe ubuzima (RBC) rigiye ku guma ku mupaka wa Goma na Rubavu kunganira iryari risanzwe kugeza iyo ndwara itakiri mu baturanyi.

Umuntu wagaragayeho Ebola yavanwe I Goma ajyanwa Butembo naho abo bari kumwe bashyizwe mu kato ngo bakurikiranwe.

Kugeza ubu, Ebola imaze guhitana ubuzima bw’abarenga 1600 muri Repubulika Iharanira Demokarasi ya Congo.

Nkurunziza Viateur @ Bwiza.com

Izindi wakunda

Bwiza.com