bwiza.com
Amakuru Politiki

Nyamasheke: Abayobozi ba FPR/ Inkotanyi basabwe kongera ingufu mu kuzamura imibereho myiza y’abaturage

Mu mahugurwa y’umunsi umwe y’inzego nshya  z’umuryango FPR/Inkotanyi ku rwego rw’Umurenge muri  Nyamasheke, abatowe basabwe byinshi birimo guharanira ko buri muturage w’aka karere agira imibereho irushijeho kuba myiza, ubunyangamugayo no kuba intangarugero muri byose byiza aho batuye  no kwirinda icyabangamira cyose ko intego z’umuryango FPR Inkotanyi mu kuzamura imibereho myiza y’abaturage zigerwaho.

Ni amahugurwa aje ngo akenewe cyane nk’uko bamwe mu baturage b’aka karere babibwiye Bwiza.com,kuko hari imirenge  yako ugisangamo ubukene bugaragara buterwa no kutagerwaho n’ibikorwa remezo bihagije, nk’ imihanda,amashanyarazi n’amasoko ku babasha kubona umusaruro bagombye kuyajyanamo, kuba nta bindi bamwe babasha gukuraho ifaranga uretse ubuhinzi bwonyine bataka amasambu mato,n’ibindi, bagasaba  aba bayobozi kubegera bagafatanya kubikemura.

Umwe mu baturage b’umurenge wa Nyabitekeri, ati’’ izi nzego nshya zatowe mu tugari,imirenge n’akarere tuzikeneyeho byinshi kuko turacyakennye kandi atari imbaraga tubuze ahubwo ari ibikorwa remezo bitatugeraho n’ibihari ntibibyazwe umusaruro wakagombye. 

Nk’ubu nta modoka itwara abagenzi igera hano kubera imihanda mibi. None se twatera imbere dute tutabasha guhahirana n’ahari amafaranga? Duturiye ikivu ariko turagisonzanye kubera ko uretse kuroba mu buryo bwa gakondo nta kindi kitumariye. Twifuza ko aya mahirwe yose y’iterambere dufite yabyazwa umusaruro kandi byashoboka aba twitoreye babigizemo uruhare kuko tuzi ko FPR ari yo moteri ya Guverinoma.’’

Muri aya mahugurwa yahawe abagize komite nyobozi  y’umuryango FPR Inkotanyi ku rwego rw’murenge,iy’urugaga  rw’abagore n’urw’urubyiruko ruwushamikiyeho,ngenzuzi na ngengamyitwarire,zose  ku rwego rw’umurenge, na komite nyobozi y’umuryango ku rwego rw’akarere, bahawe ibiganiro 4 by’ingenzi birimo ikivuga kuri Idewoloji ya FPR,imikorere n’imikoranire biganisha ku iterambere rirambye,imyitwarire y’abanyamuryango no kubazwa ibyo bashinzwe,,gutegura,gukurikirana no gusuzuma ibikorwa n’icy’ubukangurambaga bushingiye ku bikorwa abanyamuryango bagiramo uruhare,byose bigiye kubafasha kunoza imikorere n’imikoranire n’abaturage,abahuguwe bakazahugura abo mu tugari.

Mu kiganiro bahawe n’umunyamabanga wa FPR Inkotanyi ku rwego rw’intara y’uburengerazuba Mukandekezi Françoise yababwiye ko imikorere y’abaturage itatungana iyabo ubwabo itameze neza ari yo mpamvu bagomba kuba ‘nkore neza bandebereho’,ibyo basaba abaturage bakabanza kubigira  ubwabo,basabwa kwirinda imikorere ikunda kugaragara yo kwanga kwiteranya,gutekinika bamwe bashaka kwigaragaza neza kandi babeshya,bamwe mu bakoresha barenganya abakozi bayoboye, gukora bikiza,za munyangire n’ibindi bigayitse,bagaharanira ko ubagannye wese anyurwa na serivisi ahawe,ikitagenda neza bakavugisha ukuri aho kubeshya ngo bakunde bagaragare neza.

Ati’’ byose nibikorwa neza nta kabuza abaturage bazagira aho bava n’aho bagera mu iterambere kandi ni cyo twese twifuza,tukanabasaba gushyira imbaraga cyane cyane mu rubyiruko nk’amizero y’igihugu cy’uyu munsi n’ejo hazaza.’’

Muneza Degrace,perezida w’urugaga rw’urubyiruko rushamikiye ku muryango FPR Inkotanyi ku rwego rw’aka karere,asanga hari byinshi bikididiza urubyiruko birimo ubushomeri,ubunebwe,gusuzugura imirimo imwe n’imwe,inda zitateganijwe mu bangavu n’ibiyobyabwenge, agasaba abo bafatanije guhaguruka bakamenya urugero ibi bibazo byose bibangamyeho, bagafatanya gushaka ibisubizo,agasanga buri wese nakora atizigama bitazabura gukemuka.

Chairman w’uyu muryango  mu murenge wa Rangiro Hafashamungu Innocent, asanga abaturage bawo bakeneye kwitabwaho byihariye.

Ati’’ barakennye cyane rwose kuko turacyari inyuma mu bikorwa remezo kandi ntitwazamuka bidahari. Turi mu mirenge mike cyane itagira imihanda mizima iyihuza n’indi mirenge,nta soko,nta bagiro,nta mushinga n’umwe uteza abaturage imbere, nta gihingwa na kimwe ngengabukungu duhinga n’urutoki twacungiragaho kirabiranya irugeze kure,hari abakibika amafaranga mu bimuga kubera ko SACCO iri iyo bigwa,n’ibindi byinshi bikeneye imbaraga zisumbuyeho  ngo uyu natwe eimbere.’’

 Chairman w’uyu muryango ku rwego rw’aka karere akaba n’umuyobozi wako Kamari Aimé Fabien avuga ko ku ntore ibi byose babona nk’ibibazo nta gikanganye kirimo igihe bakorana umurava n’ubunyangamugayo ibyo bashinzwe, akabasaba gushyira mu bikorwa neza imyanzuro 21 bahafatiye, mu rwego rwo gukemura ibibazo byose bikigaragara.

Abayobozi batowe ku rwego rw’umurenge bakurikirana amahugurwa

Izindi wakunda

Bwiza.com
error: Alert: Ntabwo byemewe!!