bwiza.com
Amakuru Politiki

Nta we uzavogera Igihugu cyacu aciye mu Ntara y’Amajyaruguru- Guv. Gatabazi

Guverineri w’Intara y’Amajyaruguru, Gatabazi JMV yasabye abaturage b’iyi Ntara kudaha icyuho uwashaka gusenya ibyo u Rwanda rumaze kugeraho.

Yabitangaje kuri uyu wa Mbere tariki ya 15 Nyakanga 2019, mu Kagari ka Nyagahinga, Umurenge wa Cyanika, Akarere ka Burera, ubwo hatangizwaga ku mugaragaro Ukwezi kwahariwe ibikorwa bya Polisi ku rwego rw’Intara y’Amajyaruguru.

Ni igikorwa kitabiriwe n’abayobozi batandukanye mu nzego za Leta n’iz’umutekano. Guverineri Gatabazi akaba yizeza ko nta we uzavogera u Rwanda aturutse muri Iyi Ntara. Yagize ati “Abaturage b’Intara y’Amajyaruguru ntituzemera ko hari uwasenya ibyo tumaze kugeraho; nta we uzavogera Igihugu cyacu aciye mu Ntara y’Amajyaruguru”.

Umunyamabanga wa Leta muri Minisiteri y’Ubuzima ushinzwe ubuzima rusange, Dr Ndimubanzi Patrick, wari umushyitsi mukuru muri uyu muhango wo gutangiza ukwezi kwahariwe ibikorwa bya Polisi, yasabye abaturage bo muri iyi ntara, guca ukubiri n’ikitwa ibiyobyabwenge, bakarushaho kwirindira umutekano birinda icyabashora mu byaha.

Yagize ati “Ndasaba abaturage b’Akarere ka Burera kwirinda ibiyobyabwenge kuko ari nyirabayazana y’ibyaha bitandukanye. Ndabasaba rwose kubihagarika burundu”.

Ikindi asaba abaturage b’aka karere ni ugukaza ingamba zo gukumira no kwirinda icyorezo cya Ebola, bimakaza isuku muri byose kandi birinda gukora ingendo zitari ngombwa mu bihugu icyo cyorezo kigaragaramo.

Insanganyamatsiko y’Ibikorwa bya Polisi y’uyu mwaka iragira iti, “Imyaka 19 y’ubufatanye mu bikorwa byo kubungabunga umutekano no guteza imbere imibereho myiza y’abaturage”.

Abayobozi mu nzego zitandukanye barasaba abaturage kutagira uwo baha icyuho agamije guhungabanya umutekano
Dr Ndimubanzi Patrick yasabye abaturage b’i Burera guca ukubiri n’ibiyobyabwenge

 

 

Izindi wakunda

Bwiza.com
error: Alert: Ntabwo byemewe!!