bwiza.com
Amakuru mu Rwanda

Rwamagana: Barishimira uruhare rw’imihigo mu guhindura imibereho y’abaturage

Abaturage bo mu Karere ka Rwamagana, Intara y’Iburasirazuba, barishimira uruhare imihigo igira mu guhindura imibereho yabo,  n’uruhare bagira mu kuyesa.

Ku wa Mbere tariki ya 15 Nyakanga 2019, itsinda risuzuma imihigo ryatangiye isuzuma ku mihigo 75 Akarere ka Rwamagana basinyanye na Perezida wa Repubulika,  muri Kanama 2018 .Abaturage n’abafatanyabikorwa  b’akarere ka Rwamagana bibumbuye mu ihuriro ry’abafatanyabikorwa mu iterambere ry’akarere JADF bavuga ko bishimira ubufatanye bw’ubuyobozi bw’akarere bufasha abafatanyabikorwa n’abaturage gushyira mu bikorwa ibikorwa biyemeje. .

Musabyemariya Jeannette utuye mu Kagari ka Nkomangwa, mu murenge wa Munyiginya ni umwe mu baturage ushimira ubuyobozi bw’akarere n’abafatanyabikorwa bafasha abaturage guhindura ubuzima bwabo .

Yagize ati “Mu murenge wacu turishimira ko ubuzima bw’abaturage bwahindutse kubera ko twasobanukiwe n’akamaro ko guhiga, buri muturage aba afite imihigo yahize, turashimira n’abafatanyabikorwa badutera inkunga nkatwe twifashishije igikoni cy’umudugudu twabashije kwiteza imbere nta muturage mu kagari kacu ufite umwana ufite ikibazo cy’imirere”.

Yakomeje avuga ko abaturage bose bahawe amahugurwa ndetse umushinga wa AEE ubatera inkunga, bakora imishinga iciriritse, abatishoboye nabo ngo borojwe amatungo magufi,  buri muturage akaba yaratojwe no gukorera ku mihigo kandi byafashije bensahi kuva mu bukene.

Abafatanyabikorwa  bishimira imikoranire myiza n’akarere  bakemeza ko byihutisha ibikorwa bigamije imibereho myiza n’iterambere ry’umuturage .

Uwayezu Valens yemeza ko imikoranire myiza n’ubuyobozi bw’Akarere byatumye ibikorwa bakorera abaturage bigerwaho mu gihe mbere ya 2017 ngo abafatanyabikorwa bashinjwaga kudindiza imihigo.

Aragira ati “Turashimira ubuyobozi bw’Akarere uburyo dukorana neza, nkatwe abagize JADF ntibitugora kuganira n’ubuyobozi bw’akarere kuko buri mufatanyabikorwa wese aba yisanga ku bayobozi b’akarere ndetse ntibisaba ko tubanza gusaba kubonana n’umuyobozi igihe hari ibyo dukeneye kuganira ku bikorwa bikorwa n’abafatanyabikorwa bari muri JADF”.

Avuga ko imikoranire yagize akamaro ubu hakaba hari ibikorwa bagizemo uruhare bakabasha guhigura imihigo. Ati “Byagize uruhare mu guhindura imibereho myiza y’abaturage, hari ikigo nderabuzima n’amavuriro mato twubatse n’ibindi bikorwa birimo kurwanya imirire mibi mu bana byose twabigezeho kubera imikoranire myiza”.

Umuyobozi w’akarere ka Rwamagana, Mbonyumuvunyi Radjabu yemeza ko abaturage bagira uruhare mu mihigo kandi ko batakiri abagenerwabikorwa ahubwo nabo babaye abafatanyabikorwa.

Aragira “Imihigo ni iy’abaturage, iyo hari uwo tutagezeho tujya kuwubwira abaturage kuko imihigo ni iyabo, bagira uruhare mu bikorwa bibakorerwa ,ubu ahantu hose hahurira abantu haba hamanitse ibyapa biriho imihigo kugira ngo bamenye imihigo yabo kandi dufatanya nabo kuyishyira mu bikorwa ,abaturage bacu ntibakiri abagenerwabikorwa ahubwo babaye abafatanyabikorwa kuko ibyo tubakorera babigiramo uruhare”.

Mu mwaka w’imihigo  2018/2019, ubuyobozi bw’Akarere bwemeza ko imihigo 75 umuyobozi w’akarere yasinyanye na Nyakubahwa Perezida wa Repubulika  bayesheje ku gipimo cya  99,08% .

Izindi wakunda

1 Igitekerezo

uwitonze j.marie v 20/07/2019 8:31 am at 8:31 am

Nukuri rwamagana ikomeje Guca agahigo pe! mukomereze aho mutange ikosora mutundi turere baze babigireho murakoze

Subiza

Tanga Igitekerezo

Bwiza.com
error: Alert: Ntabwo byemewe!!