bwiza.com
Amakuru Utuntu n'utundi

Ababarirwa mu mamiliyoni barashaka gutera mu duce tubiri tw’amayobera

Abantu batandukanye barashaka gukora amateka bakavuguruza ibivugwa ndetse byizerwa na bamwe ko ari ukuri.

Byatangiye hakorwa ubukangurambaga bukorerwa ku rubuga rwa Facebook, basaba ababatera ingabo mu bitugu ngo bazatere agace ka 51 cyangwa se Area 51, karimo ibikoresho by’ingabo za Leta zunze Ubumwe z’Amerika zirwanira mu kirere muri Nevada. Aka gace ni na ko iki gisirikare gikoreramo imyitozo.

Aka gace kavugwaho kuba icumbi ry’ibiremwa byaturutse ku wundi mubumbe byitwa ‘aliens’. Bikavugwa ko bifite ikoranabuhanga ridasanzwe ku buryo igisirikare cy’Amerika kibyifashisha mu gukora igisirikare gihambaye mu ikoranabuhanga.

Ibi bintu byatangiye ari nk’imikino ariko kugeza ubu, abantu bagera kuri miliyoni ebyiri n’igice bamaze kwemera ko bazagaba icyo gitero tariki ya 20 Nzeri 2019. Byatumye igisirikare cy’Amerika kiri muri ibi birindiro cyabyamaganiye kure, kivuga ko cyiteguye kurinda umutungo w’Amerika. Ngo ntabwo kizemera ko hari n’umwe winjira ariko na bo bavuga ko bazinjiramo yewe niba ari n’amasasu bazayasiga.

Batekereje ko bishoboka kwinjirira agace ka ‘Triangle de Bermuda’, bakagaruka nta cyo babaye n’ubwo bivugwa ko ari agace k’amayobera kaburiyemo indege n’amato menshi. Triangle de Bermuda bivugwa ko n’indege iyinyuze hejuru iburirwa irengero kuko ngo hari imbaraga zidasanzwe kuri uyu mubumbe.

Triangle de Bermuda ni agace kari mu nyajnja ya Atlantique gakoze ishusho ya mpandeshatu gafite ubuso bwa kilometero kare 699,296. Ni mpandeshatu kuko gahuje uduce dutatu ari two: Miami, Bermuda na Puerto Rico.

Aba baturage barahiriye gutera Bermuda, ndetse abategura iki gikorwa biyemeje gutanga amato yo kubagezayo. Biyemerera ko bishoboka ko bapfirayo ariko ngo si ko bose bapfa.

Anthony Carnovale, umwe mu bategura iki gikorwa yasabye abitegura kuzajya muri iki gikorwa kuzitwaza urumogi n’inzoga zikaze mu rwego rwo kwitera akanyabugabo.

Kugeza ubu, abasaga ibihumbi 40,000 ni bo bamaze kwiyandikisha ngo bazinjire muri Bermuda. Ni gahunda iteganyijwe kuri tariki ya 1 Ukwakira, 2019.

Abasesenguzi batandukanye na bimwe mu binyamakuru ntibiremeza niba aba baturage ibyo bavuga ari imikino cyangwa ari ukuri ariko hari n’urundi ruhande ruvuga ko bishoboka cyane. Ni ibintu bitezwe amaso, bikazemerwa ari uko byabaye.

Ibi ni byo bitekerezo by’abantu bigendeweho n’abantu benshi nyuma y’ibitaramenyekanye cyane byasabaga abantu gutera uduce twamamaye nk’ingoro ya Perezida w’Amerika, White House, Federal Reserve na Sea World Orlando. Ibi bitero si nk’ibya gisirikare ahubwo bigamije kumenya ukuri kwihisha inyuma y’ibivugwa; bamwe bita ibihuha, abandi bakabyita ukuri.

 

Izindi wakunda

Bwiza.com
error: Alert: Ntabwo byemewe!!