bwiza.com
Amakuru Politiki

Amategeko y’umuhanda mwiga ntimukwiye kuyasiga aha-SSP Ndushabandi

Ibi byagarutsweho kuri  uyu wa gatatu tariki ya 17 Nyakanga, ku cyicaro gikuru cya Polisi ku kacyiru ubwo hakomezaga amahugurwa ahabwa abayobozi ba koperative z’abatwara ibinyabiziga bagera ku ijana (100) baturutse mu gihugu hose, baganirizwa uko bakubahiriza amategeko agenga umuhanda mu rwego rwo gukumira impanuka.

Aya mahugurwa yateguwe na Polisi y’u Rwanda n’abafatanyabikorwa bayo afite insanganayamatsiko igira iti “ubuyobozi bwimakaza umutekano wo mu muhanda” agamije guhindura imyitwarire n’imyumvire y’abakoresha umuhanda mu kwimakaza ubukangurambaga bwa Gerayo Amahoro.

Umuvugizi w’ishami rya Polisi rishinzwe umutekano wo mu muhanda Senior Superintendent of Police (SSP) Jean Marie Vianney Ndushabandi ubwo yahuguraga abitabiriye aya mahugurwa, yababwiye ko amategeko y’umuhanda akwiye kubahirizwa  kugira ngo ubuzima bw’abakoresha umuhanda busigasirwe.

Umuvugizi w’ishami rya Polisi rishinzwe umutekano wo mu muhanda Senior Superintendent of Police (SSP) Jean Marie Vianney Ndushabandi

Yagize ati “Ntibikwiye ko wiga amategeko agenga umuhanda bikarangirira mu gihe umaze guhabwa uruhushya rw’agateganyo rwo gutwara ibinyabiziga, kuko kubyiga byari ukugira ngo bizagufashe kubahiriza amategeko  agenga umuhanda.”

Yababwiye ko buri mushoferi wese akwiye kubahiriza amategeko y’umuhanda mu rwego rwo kwirinda ko impanuka zikomeza gutwara ubuzima bw’abantu.

SSP Ndushabandi yakomeje ababwira ko bakwiye kumenya ko mu gihe binjiye mu modoka  mbere na mbere bakwiye kubanza kugenzura imodoka bagiye gutwara ko yasuzumwe ubuziranenge, bakambara umukandara, bagasuzuma ko bujuje ibyangombwa byose by’imodoka, ndetse yababwiye ko badakwiye kubikora bagamije gushimisha umupolisi.

Umuvugizi w’ishami rishinzwe umutekano wo mu muhanda yasabye abitabiriye amahugurwa kubahiriza ibyapa. Ati ” Mukwiye kwitwarararika no kubaha ibyapa, kubahiriza amatara ndangacyerecyezo, mu masangano, kunyuranaho cyangwa kubisikana mutanguranwa. Ibi byose mubyubahirije nta kabuza impanuka zacika abo mutwaye bakagera aho bagiye amahoro.”

Muri aya mahugurwa bibukijwe ko n’ubwo gutwara abagenzi bifite akamaro gakomeye bidakwiye ko bikorwa mu buryo bunyuranyije n’amategeko agenga umuhanda n’uburyo bwo kuwugendamo. Yabasabye gukangurira abashoferi bahagarariye guhora bitwararika amategeko y’umuhanda no kugira uruhare mu bukangurambaga Polisi y’u Rwanda yatangije bwa gerayo amahoro.Aya mahugurwa kandi bigiyemo ubutabazi bw’ibanze uko batabara umuntu uhuye n’impanuka mu buryo bwihuse.

Umwe mu bitabiriye aya mahugurwa Shyaka Jean de Dieu yavuze ko ari byiza kongera kwibutswa inshingano zabo za buri munsi kugira ngo bakomeze kuzishyira mu bikorwa bagenzura imikorere y’abashoferi ndetse nabo ubwabo bakubahiriza ibyo umushoferi agombwa harimo ikiruhuko gihagije n’ibindi.

Izindi wakunda

Bwiza.com
error: Alert: Ntabwo byemewe!!