bwiza.com
Amakuru mashya Politiki

USA: Abihaye Imana 65 barimo abapadiri n’ababikira bafunzwe bazira politiki y’abimukira

Kuri iyi tariki ya 18 Nyakanga 2019, abapadiri, ababikira n’abandi bihaye Imana bakoze imyigaragambyo yamagana poliki ya Donald Trump yo gutandukanya ababyeyi b’abimukira n’abana babo.

Uko bageraga kuri 200, bigaragambirije imbere y’ingoro y’inteko ya sena mu nyubako ya Capitol iherereye muri Washington DC. Inzego z’umutekano zafungiye abasaga 65 muri iki gikorwa cyiswe ‘umunsi wa kiliziya gatulika mu kuzirikana abana batandukanywa n’ababyeyi babo’.

Hashije igihe kinini, Donald Trump agaragaza ko atishimiye abimukira bajya muri iki gihugu, byatumye afata umwanzuro wo kubakisha urukuta rutandukanya igihugu ayoboye na Mexique, akomeza no kohereza ingabo n’abapolisi ku mupaka ngo zirinde abagerageza kwinjira. Mexique ni cyo gihugu gifite abimukira benshi binjira muri Amerika.

Donald Trump yavuze ko abimukira muri Amerika mu buryo butemewe batazigera bababarirwa.

Aba bana basigara bitabwaho n’ikigo cy’Amerika cyita ku buzima n’ikiremwamuntu, icyo twagereranye n’ikigo cy’imfumbyi.

Umuryango w’abibumbye ni umwe mu miryango yanenze iyi politiki. Aba bemeramana na bo bahagurutse ngo bagaragaze ibyifuzo byabo.

Kelsie Herbert ni umwe mu bitabiriye iyi myigaragambyo. Yavuze ko nk’abizera batakaza iyo sura baramutse badahagurutse ngo bavuge ku byo guverinoma iri gukora.

Ati: ” Abana ni abatagatifu. Yesu yavuze neza ko tugomba kwita ku bana. Guverinoma iramutse ifashe abana mu buryo buzima, umuryango w’abizera wahaguruka ukabivuga.”

Aba bapadiri n’ababikira bafunzwe bazira gukora imyigaragambyo itemewe nk’uko umuvugizi wa polisi muri Capitol, Eva Malecki yabivuze.

Kuva Trump yatangiye kwiyamamariza kuyobora Amerika na mangingo aya, yashyiraga imbere kugabanya umubare w’abimukira muri iki gihugu. Yaranzwe no gufata imyanzuro, ntivugweho rumwe n’abayobozi bakorana. Bamwe bagiye bivumbura, abandi arabirukana, arabasimbuza.

Muri Mata 2018, uyu mukuru w’igihugu yatangaje ko umuntu uzajya muri Amerika bitemewe n’amategeko atazahabwa imbabazi. Iperereza ryagaragaje ko abana benshi bari baramaze gutandukanywa n’ababyeyi babo cyangwa ababarera mbere y’iri tangazo.

Tariki ya 20 Kamena, 2018, Trump yemeje ko politiki yo gutandukanya abana n’ababyeyi yavaho. Kuri 26, Dana Sabraw, umunyamategeko muri California y’amajyepfo yategetse ko abana basubizwa ababyeyo babo. Kuri uwo munsi, Amerika yatangaje ko yahuje abana 1442 n’imiryango batandukanye ariko abasaga 711 bagumye mu maboko ya leta.

Byitwa ko iyi politiki yavuyeho ariko amakuru avuga ko na nyuma y’ibi bihe twavuze haruguru hari abandi bana batandukanyijwe n’imiryango.  Muri Werurwe 2019, leta yatangaje ko abandi bana 245 batandukanyijwe n’ababyeyi. No mu bihe byakurikiyeho, imibare y’aba bana yakomeje kwiyongera.

The Independent/UK

Izindi wakunda

Bwiza.com
error: Alert: Ntabwo byemewe!!