bwiza.com
Ahabanza » Amafoto: Senateri Bishagara Kagoyire Thérèse yasezeweho mu cyubahiro
Amakuru mashya Featured Politiki

Amafoto: Senateri Bishagara Kagoyire Thérèse yasezeweho mu cyubahiro

Kuri uyu wa Gatanu, itariki 19 Nyakanga 2019, mu Nteko Ishinga Amategeko, mu Ngoro ya Sena habereye umuhango wo gusezera mu cyubahiro nyakwigendera Senateri Bishagara Kagoyire Thérèse witabye Imana ku itariki ya 8 Nyakanga 2019.

Mu butumwa bwa Perezida wa Repubulika, Paul Kagame, bwasomwe na Minisitiri muri Perezidansi, Judith Uwizeye, yavuze ko we n’umuryango we bababajwe n’urupfu rwa Senateri Kagoyire Thérèse bakaba bifatanyije n’umuryango we mu kababaro.

Naho Perezida wa Sena, Bernard Makuza, mu ijambo yagejeje ku bitabiriye uyu muhago wo gusezera mu cyubahiro Senateri Kagoyire, yavuze ko nubwo bitoroshye kubura umubyeyi wuje urukundo n’umurava ariko batagombye guheranwa n’agahinda.

Yakomeje agira ati: “Mu gihe nk’iki tubuze uwo twakundaga, buri wese yisangagaho, umuntu abura amagambo akwiye. Abagize Sena tuzakomeza kubanira abo assize, nk’uko nawe yabikoreye benshi yakoranye cyangwa yabanye nabo.”

Yakomeje agira ati: “Muri uyu mwanya dusezera mu cyubahiro kuri Hon. BISHAGARA, Kagoyire Thérèse, twakundaga kwita Maman Tereza, turazirikana twishimira ibyamuranze asize nk’umurage we”.

Perezida wa Sena yavuze ko itabaruka rya Mama Tereza ari igihombo gikomeye ku muryango we, kuri Sena no ku gihugu cyose. Ati: “Tubuze umuyobozi w’umuhanga, wacishaga make, akarangwa n’ubushishozi n’ubwitange mu mirimo yari ashinzwe.”

Abayobozi batandukanye barimo Umunyamabanga Mukuru wa RPF, Kagoyire yari abereye umunyamuryango, bakaba basezeye bwa nyuma Senateri Bishagara Kagoyire Thérèse muri uyu muhango wabereye mu cyumba cy’inteko rusange cya Sena y’u Rwanda.

Nyuma yo gusezera kuri nyakwigendera Senateri Bishagara Kagoyire Thérèse mu Nteko Ishinga Amategeko, hakurikiyeho igitambo cya misa cyo kumusabira muri Paruwasi ya Regina Pacis.

Nyakwigendera Senateri Bishagara Kagoyire Thérèse yari muntu ki?

Senateri Bishagara Kagoyire Thérèse yavutse kuwa 25 Ukuboza 1952, akaba yari umusenateri uhagarariye Intara y’Uburengerazuba. Yari afite impamyabumenyi y’icyiciro cya kabiri cya Kaminuza mu bijyanye n’ibinyabuzima (Molecular Biology Sciences).

Nyuma yo kwiga amashuri abanza, kuva mu 1966 kugeza mu 1972 yize amashuri yisumbuye muri Lycee de Amani iri I Goma Muri Repubulika Iharanira Demokarasi ya Kongo.

Mu mirimo yakoze, Senateri Bishagara Kagoyire Thérèse yayoboye itsinda ry’ubushakashatsi muri PNLS/CNLS HIV/AIDS Center mu 1995-1996, yabaye umuyobozi wa KHI muri 1996-2004, umwarimu udahoraho mu yahoze ari Kaminuza Nkuru y’u Rwanda (NUR) mu 1999-2003.

Hagati ya 2008-2011 yabaye umuyobozi ku rwego rw’igihugu w’umuryango JHPIEGO /MCHIP ushamikiye kuri Johns Hopkins University (USAID), umujyanama mu bya tekiniki muri gahunda ya PSI mu 2005-2006.

Mu 2006 kandi yabaye umujyanama mu bya tekiniki muri Save the Children-UK, aba Perezida wa Profemmes Twese -Hamwe na COCAFEM /Great Lakes (2007-2011).

Yabaye mu nama y’ubutegetsi y’icyari ikigega gishinzwe gutera inkunga ibikorwa by’iterambere mu nzego z’ibanze cyaje guhinduka Ikigo gishinzwe iterambere mu nzego z’ibanze (LODA) mu 2007-2011.

Mu 2007-2011 yabaye umwe mu bagize inama y’ubutegetsi ya Kaminuza yigenga ya Kigali (ULK), yari umwe mu bashinze akaba no mu nama y’ubutegetsi ya FAWE Rwanda, kuva mu 1997.

Kuva mu 2008-2011 kandi yabaye umwe mu bagize inama y’ubutegetsi ya White Ribbon Alliance igamije kurengera ubuzima bw’abagore n’abana.

Izindi wakunda

Bwiza.com