bwiza.com
Ahabanza » Li Ching-Yuen, Umushinwa utavugwaho rumwe ushobora kuba yarabayeho imyaka isaga 250
Amakuru IBYEGERANYO Utuntu n'utundi

Li Ching-Yuen, Umushinwa utavugwaho rumwe ushobora kuba yarabayeho imyaka isaga 250

Li Ching-Yuen bivugwa ko yavutse mu 1677 cyangwa 1736 agapfa kuwa 06 Gicurasi 1933, ni Umushinwa wari umuvuzi, umukinnyi w’imikino njyarugamba, n’umujyanama mu bya tactic, uzwiho kuba ari we muntu wabayeho iigihe kinini mu bihe bya vuba. Yavuze ko yavutse mu 1736, mu gihe inyandiko zitavugwaho rumwe zigaragaza ko yavutse mu 1677, kubw’ibyo akaba abarirwa kuba yarabayeho imyaka hagati y’197 na 256.

Itariki nyayo yavukiyeho ntabwo yigeze yemezwa, kandi ibyo we yivugiye byanyomojwe n’abahanga mu bijyanye n’uburambe mu by’imyaka.

Li Ching-Yuen yamaze igihe cye kinini mu misozi. Yabayeho nk’umuvuzi gakondo acuruza imiti itandukanye nka Lingzhi, goji berry, giseng, he shou wu na gotu kola n’indi miti y’ibyatsi, kandi yabayeho atunzwe n’iyi miti n’umuvinyu ukoze mu muceri.

Byaje kwemezwa mu ntara ya Sichuan, ko Li yari yarize byuzuye akiri umwana, kandi ko ku myaka 10 yakoze ingendo Gansu, Shanxi, Tibet, Vietnam, Thailand na Manchuria agamije gukusanya ibyatsi, aho yamaze ikinyejana muri ibi mbere yo gutangira kujya agura ibyatsi yazaniwe n’abandi.

Nyuma y’ibi nibwo yimukiye ahitwa kai Xian, maze aha ku myaka 72, mu 1749, yinjira mu gisirikare cy’umugaba mukuru w’ingabo z’intara, Yeuh Jong Chyi, nk’umwarimu w’imikino njyarugamba ndetse n’umujyanama mu bya tactics z’intambara.

Nk’uko byemezwa na Wikipedia, ngo mu 1927, General Yang Sen, wo Mu Gisirikare cy’u Bushinwa kitwaga “National Revolutionary Army” yamutumiye iwe mu rugo muri Wan Xian, mu ntara ya Sichuan, aho ifoto ye igaragara muri iyi nkuru yafatiwe.

Undi mujenerali w’Umushinwa witwa Wu Peifu yaje kujyana Li Ching-Yuen iwe ngo agamije kugerageza kuvumbura ibanga ryo kubaho imyaka 250.

Li Ching-Yuen yaje gupfa kuwa 06 Gicurasi 1933, asiga umugore we wa 24 wari ufite imyaka 60 y’amavuko. Bivugwa ko uyu mugabo ashobora kuba yarasize abana 200 bamukomokaho yabyaranye n’abagore 23. Andi makuru akavuga ko yasize abamukomokaho 180 bari bakiriho ubwo yapfaga ndetse no kuba yarashatse abagore 14.

Nyuma y’urupfu rwe, Gen Yang Sen yamwanditseho igitabo yise mu cyongereza “ A Factual Account of the 250 year-old Good-Luck Man”, asobanuramo uko Li yagaragaraga, afite amaso abona neza, afite metero zisaga ebyiri z’uburebure, inzara ndende z’intoki n’ibindi.

Mu gihe bivugwa ko Li Ching-Yuen ubwe yivugiye ko yavutse mu 1736, Wu Chung-chieh, umwarimu muri Kaminuza ya Chengdu, yemeje ko Li yavutse mu 1677, nk’uko byemezwa n’inkuru ya The New York Times yo mu 1930.

Wu ngo akaba yarabonye inyandiko za Guverinoma y’u Bushinwa zo mu 1827 zishimira Li ku isabukuru ye y’imyaka 150, ndetse izo nyandiko zigaragaza ko yongeye gushimirwa nyuma  ku isabukuru y’imyaka 200 mu 1877. MMu 1928 umunyamakuru wa The New York Times akaba yari yanditse ko benshi mu basheshe akanguhe b’aho Li yavukiye bemeza ko ba sekuru babo bari bamuzi bakiri abahungu bato kandi we icyo gihe yari umugabo ukuze.

 

 

Izindi wakunda

Bwiza.com